Sangapulo ket lima a polis ti mabalin a makasuan gapu iti pannakairamanda iti panagpukaw ken ipapatay dagiti “sabungeros” (mammallot), kinuna ni Department of Justice (DOJ) Secretary Jesus Crispin C. Remulla ita a Biernes, Hulio 4.
Segun ken ni Remulla, naingetanen dagiti 15 a polis ken naibilin dagitoy nga ag-report-da laeng kadagiti opisinada.
Kinunana a bayat ti pannakaimbestigar kadagiti kaso, adda dagiti alegasion a dagiti polis ti nangisayangkat iti pannakapapatay dagiti “sabungeros.”
Idi napagsaludsodan no maipila ti kaso kontra kadagiti polis, kinuna ni Remulla a “daytat' turongennan.”
Saanna nga impalgak ti nagan dagiti polis wenno lugar a destinoda.
Pannakakemmeg ni Sen. Dela Rosa, imbilin ti DOJ; PNP, pinagtignay ni DILG Sec. Remulla
Nakisarita ni Remulla iti DOJ iti Manila kadagiti kameng ti pamilia dagiti “sabungeros” ken impanamnamana kadakuada nga aramidenda ti amin iti DOJ tapno masolbar dagiti kaso.
Sakbayna, kinuna ni Remulla a nabigbig a kas suspek ti negosiante a ni Charlie “Atong” Ang ken ti mapapati a dati a girlfriend-na a ni Gretchen Barretto ket agtultuloy itan ti imbestigasion.
Inlibak met da Ang ken Barretto dagiti pammabasol kadakuada. (Jeffrey Damicog/MANILA BULLETIN)
