Sisasaganan ti Department of Social Welfare and Development (DSWD) a tumulong kadagiti pamilia nga inapektaran ni tropical depression “Bising” ken ti abagat (southwest monsoon), ken naipanen ti nasurok a tallo a milion a food pack iti nadumaduma a lugar iti pagilian.
Kinuna ni Maria Isabel Lanada, direktor ti Disaster Response Management Bureau (DRMB) ti DSWD, ita nga aldaw, Hulio 4, a naipanen dagiti food pack kadagiti 935 nga storage facility sakbay pay a nagbalin a tropical depression ti LPA.
Inwagaragawag ni Lanada nga adda 337,500 non-food items kadagiti field office ti DSWD kas iti family and kitchen kits, ules, ken modular tent, tapno masaranay dagiti apektaran ti nadawel a panawen.
Nakasagana met dagiti alikamen a pagresponde no kasapulan, agraman dagiti mobile command center a naisaad kadagiti field office iti entero a pagilian. (Ellalyn De Vera-Ruiz/Manila Bulletin//Lito Hilidon/Bannawag)
