Kinasuan ni Philippine Coast Guard (PCG) spokesperson for West Philippine Sea (WPS) Commodore Jay Tarriela iti cyberlibel ti vlogger a ni Sass Rogando Sasot gapu iti mapapati a panangiwaras daytoy iti awan pagbatayanna, malisioso, ken personal unay a panangatakar iti online kontra ken ni Tarriela.
Dimmatag ni Tarriela iti Manila City Prosecutor’s Office ita nga aldaw, Hulio 4, babaen ti tulong ti grupo a Movement Against Disinformation (MAD) tapno ipilana ti darumna.
Segun ken ni Tarriela, kasapulan ti legal nga aksion kas sungbat iti panangatakar ni Sasot, saan laeng nga iti personal a biagna (Tarriela), no di ket pay iti annongenna a kas spokesperson ti Philippine Coast Guard.
Kinuna ni Tarriela nga idinto a raemenna ti wayawaya ti panagsao iti demokratiko a pagilian, saan a mairaman iti dayta ti panagiwaras iti palso nga impormasion, personal defamation, wenno panangipababa iti panagtalek ti publiko gapu iti kinaulbod.
Kasapulan ti natibker ken nainkalintegan a pagtaktakderan iti parikut iti WPS --NMC
Iti sabali a bangir, kinuna ni Sasot nga adda karbengan ni Tarriela a mangidarum iti asino man. Innayonna nga urayenna ti legal complaint a maipatulod iti agdama a pagtaenganna nga adda iti ruar ti Filipinas, tapno maidatagna met ti sungbatna. (Martin Sadongdong/Manila Bulletin//Lito Hilidon/Bannawag)
