Nagbalinen a tropical depression ti low-pressure area (LPA) nga adda iti laud ti Cagayan ket napanaganan iti "Bising," kas inwaragawag ti Philippine Atmospheric, Geophysical and Astronomical Services Administration (PAGASA) ita nga aldaw, Hulio 4.
Itay 3:00 iti parbangon, nasaripatpatan ti sentro ni tropical depression Bising iti 200 a kilometro (km) iti laud-amianan a laud ti Calayan, Cagayan. Addaan daytoy iti kapigsa ti angin a 45 a kilometro kada oras iti asideg ti sentrona, ken pugso nga agingga iti 55 a kilometro kada oras.
Agpaabagatan a laud iti kapardas a 20 a kilometro kada oras.
Segun ken ni Loriedin de la Cruz-Galicia, a weather specialist ti PAGASA, manamnama a naginad ti panagtignay ni Bising nga agpaabagatan iti sumaruno a 12 nga oras ken posible a rummuar iti Philippine Area of Responsibility (PAR) ita nga aldaw.
Pannakaipaay iti bayad ti insurance kadagiti naaksidente iti Isabela, papardasen ti LTFRB
Nupay kasta, kinuna ti PAGASA a mabalin nga agpaamianan a daya ni Bising ken posible nga agsubli daytoy iti PAR inton Hulio 6.
Naibayog ti Tropical Cyclone Wind Signal (TCWS) No. 1 iti laud a paset ti Babuyan Islands, nangruna dagiti isla ti Calayan ken Dalupiri, ken ti amianan a laud a paset ti Ilocos Norte, a pakairamanan dagiti ili ti Pagudpud, Bangui, Burgos, Pasuquin, ken Dumalneg.
Yeg ni Bising ti napigsa a tudo iti dadduma pay a paset ti Amianan a Luzon kas iti Batanes, Cagayan, Apayao, Abra, ken Kalinga.
Malaksid ken ni Bising, mangyeg met ti nasaknap a tudo ti pimmigsa nga abagat (southwest monsoon) iti Metro Manila, Pangasinan, Zambales, ken Bataan, agraman iti Ilocos Sur, La Union, Benguet, Ifugao, Mountain Province, Tarlac, Pampanga, Bulacan, Rizal, Laguna, Cavite, Batangas, ken Occidental Mindoro. (Ellalyn De Vera-Ruiz/Manila Bulletin//Lito Hilidon/Bannawag)
