No agpayso a ti pannakaiparit kadagiti ubbing nga agusar iti social media ket mangipaay iti pagimbagan dagiti agtutubo ken iti salun-at ti panunotda, suportaran ni Presidente Ferdinand Marcos Jr. dayta.
Daytoy ti kinuna ni Undersecretary ti Presidential Communications Office (PCO) Claire Castro idi Hulio 3 idi masaludsod no ania ti kapanunotan ti presidente iti singasing a linteg ni Senador Panfilo Lacson, a mangiparit iti panagusar dagiti ubbing iti social media platform.
Maibatay iti gakat ni Lacson, dinakamatna ti sukisok ti United Nation Children’s Fund (UNICEF) a nangiparang a nagbalinen a biktima dagiti menor de edad a Filipino iti cyberbullying, body image pressures, ken online harassment.
Segun ken ni Lacson, addan kastoy a polisia ti dadduma a pagilian kas iti Australia a nangipaulog iti linteg a mangkontrol iti access dagiti ubbing iti social media ken dadduma pay nga online platform. (Betheena Unite/Manila Bulletin//Lito Hilidon/Bannawag)
