Impila ni Bukidnon 2nd district Rep. Jonathan Keith Flores iti maika-20 a Kongreso ti House Bill (HB) No.381, wenno ti gakat a mangiparit iti political dynasty iti Filipinas.
Ni Flores, 53, a maysa nga abogado a kameng ti grupo a Young Guns iti Kamara, ket anak ti dati a diputado ken mayor ti Malaybalay, Bukidnon a ni Florencio Flores Jr.
Iti maysa nga interbiu idi Hulio 4, situtured ni Flores a nangaklon a dakkel ti naitulong kenkuana ti panagkanaganda (agkaapeliedo) ken ni tatangna.
Nupay maisupiat daytoy iti bukodna nga interes, kinuna ni Flores a maitutop pay laeng a maipaulog ti linteg a mangiparit iti political dynasty, gapu ta iparit daytoy ti 1987 Constitution.
Independent People's Commission, anti-political dynasty, party-list reform bill, prioridad ti Senado
Ilawlawag ti HB No.381 a maibilang a political dynasty ti panagtitipon, panangpapigsa ken/wenno panangilayon kadagiti politikal a bileg dagiti tattao nga agkakabagian agingga iti second degree of consanguinity.
Segun iti gakat, maibilang a political dynasty no adda dua wenno nasursurok pay nga agassawa wenno agkabagian (agingga iti second degree of consanguinity), nga aggiddan nga agkandidato a kas opisial iti national level; wenno iti lokal a lebel iti isu met laeng a probinsia, distrito ken/wenno ili/siudad, ken iti isu met laeng a barangay ken/wenno iti isu met laeng a distrito; uray saanda a kapin-ano ti agdama nga opisial. (Ellson Quismorio/Manila Bulletin//Lito Hilidon/Bannawag)
