Manggubuay ti ipus ti tropical storm a "Danas" (dati a “Bising”) iti tudo kadagiti lugar iti amianan a Luzon, idinto nga apektaran met ti abagat (southwest monsoon) ti kaaduan a paset ti pagilian, segun iti Philippine Atmospheric, Geophysical and Astronomical Services Administration (PAGASA) ita nga aldaw, Hulio 5.
Itay 3:00 iti parbangon, nasaripatpatan ti PAGASA ti bagyo iti 480 a kilometro (km) iti laud ti Basco, Batanes, iti ruar ti Philippine Area of Responsibility (PAR). Addaan daytoy iti kapigsa a 75 km kada oras iti asideg ti sentrona ken pugso nga agingga iti 90 km kada oras, nga agpa-laud.
Kinuna ti PAGASA a yeg ti ipus ni "Bising" ti naulep a tangatang ken nasaknap a panagarbis ken panagtudo iti Batanes ken Babuyan Islands, agraman iti Metro Manila, Ilocos Region, Cordillera Administrative Region (CAR), Central Luzon, Calabarzon, Mimaropa, ken ti natda a paset ti Cagayan Valley. (Merlina Hernando-Malipot/Manila Bulletin//Lito Hilidon/Bannawag)
