Ad-adalen ti gobierno ti posible a pannakawaswas ti joint venture agreements (JVA) iti nagbaetan ti PrimeWater Infrastructure Corporation a kukua dagiti Villar ken dagiti local water districts (LWD) iti pagilian, segun iti Local Water Utilities Administration (LWUA) idi Hulio 4.
Inlawlawag ni LWUA Administrator Jose Moises Salonga, a maysa daytoy kadagiti kitkitaenda a wagas, ngem saan a daytoy ti prioridad ti gobierno ta saan a mangpataud iti danum ti panangwaswas ken panangpilit iti PrimeWater.
Kinuna ni Salonga nga iti agdama, ipangpangruna ti gobierno ti pannakataming ti parikut iti danum.
Segun ken ni Salonga, nairaman iti komrepehensibo a report ti LWUA iti PrimeWater dagiti detalye maipapan kadagiti JVA.
Pannakaipaay iti bayad ti insurance kadagiti naaksidente iti Isabela, papardasen ti LTFRB
Nailawlawag iti report ti pakasaritaan ti pannakabuangay ti joint venture, agraman dagiti posible a parikut iti Board of Directors ti LWUA, kas iti posible a conflict of interest idi adda pay laeng ti LWUA iti sidong ti Department of Public Works and Highways (DPWH) nga idadauluan idi ni Mark Villar.
Innayon ni Salonga nga indatagdan dagiti natakuatan, singasing, ken dagiti mabalin nga aramidenna tapno marisut ti parikut iti danum.
Madama a reprepasuen ni Presidente Marcos Jr. ti report ti LWUA mainaig iti PrimeWater, ket sisasagana ti gobierno a mangipakat iti legal nga addang maibatay iti natakuatan ti LWUA. (Ruth Abbey Gita-Carlos/PNA//Lito Hilidon/Bannawag)
