Impaganetget manen ti Mines and Geosciences Bureau (MGB) ti Department of Environment and Natural Resources (DENR) nga isardengen dagiti illegal a babassit a minero iti Nueva Vizcaya ti napeggad nga aktibidadda, kalpasan ti trahedia iti panagminas itay nabiit a nakatayan ti lima a tattao.
Inulit ni MGB Regional Director Mario Ancheta ti pakdaarda kalpasan ti insidente iti Barangay Runruno, Quezon, Nueva Vizcaya, a nakatayan ti tallo nga small-scale a minero bayat ti panagminasda iti uneg ti maysa nga usok. Dua met a boluntario a rescuer ti natay bayat nga ikagkagumaanna nga isalakan ti maysa kadagiti minero a naawanan puot iti usok.
Kinuna met ni Runruno Barangay Captain John Babliing nga agpada nga impaay ti gobierno munisipal ken ti barangay ti suporta ken tulongda kadagiti pamilia dagiti biktima. Nangipaay pay ti Municipal Social Welfare and Development Office, babaen ti koordinasion ti Provincial ken National Social Welfare Offices, iti psychological support ken dadduma pay a serbisio kadagiti natayan a pamilia.
Pinabasol ni Ancheta ti di autorisado a panagminas a nakaigapuan ti insidente, a dinakamatna a dagiti kakastoy nga operasion ket saan laeng a mamagpeggad iti biag dagiti minero no di ket mamagpeggad pay iti aglawlaw ken kadagiti adda iti asideg nga autorisado a lugar ti panagminas.
ITI ILOCOS SUR: Mannalon, binagkongna ti kabsatna
Kinuna pay ni Ancheta a ti pannakatay dagiti minero ken dadduma pay ket direkta a resulta ti illegal ken agtultuloy a panangpadas dagiti small-scale a minero a manglukat manen ken mangusar kadagiti daan nga usok.
Innayonna a ti MGB, iti pannakitinnulong dagiti local government unit (LGU) ti Quezon ken Runruno, kasta met dagiti nasional ga ahensia a kas iti Philippine National Police, National Bureau of Investigation, ken ti Philippine Army, ket aktibo a mangrakrakrak ken mangkomkompiskar kadagiti pasilidad ken alikamen a maus-usar iti illegal mining operations iti Barangay Runruno.
Segun iti report ti MGB, naiserran ti FCF Minerals Corporation, maysa nga autorisado a kompania ti panagminas, ti agarup 80 a tunnel networks a dati nga us-usaren dagiti illegal nga small-scale a minero iti nasao a lugar.
“Naynay nga agtungtungpal ti kompania ti panagminas kadagiti pagannurotan iti aglawlaw. Nasinged ti pannakitinnulongmi kadakuada iti kampaniatayo kontra kadagiti makadadael ken illegal nga aktibidad ti panagminas,” kinuna ni Ancheta.
Dinakamatna pay nga idagdagadag dagiti opisial ti Barangay Runruno kadagiti illegal small-scale miner, nga adu kadagitoy ket informal settlers pay, a panawandan ti lugar gapu iti pannakaklasipikar daytoy kas geo-hazard zone.
Daytoy a rekomendasion ket nagtaud manipud iti immun-unan a DENR-MGB geo-hazard study a nangbigbig kadagiti dakkel a pagpeggadan iti lugar. Idi Nobiembre 2020, sangapulo a tattao ti natay idi nagaburan dagiti balbalyada iti panagreggaay.
Kinuna met ni outgoing Quezon Mayor Dolores Binwag a nakikadua ti LGU iti Department of Human Settlements and Urban Development tapno mayakar dagiti umili manipud kadagiti high-risk area, ngem nataktak ti implementasion.
“Naipakaammo kadakami a ti pondo nga immuna a nailatang para iti relocation project ket naiturong iti dadduma a lugar. Nupay kasta, ur-urayenmi ita ti pannakairuar ti baro a pondo,” kinuna ni Binwag. (Ben Moses Ebreo/PIA Nueva Vizcaya)
