Magmagna dagiti estudiante iti grade school iti kainaran idiay Imus, Cavite idi Hunio 17, 2025. (Retrato ti PNA ni Avito Dalan).

Nangipila ni Senador Loren Legarda ita a Lunes, Hulio 7, iti gakat a linteg a mangikalikagum a mang-institutionalize iti sangapagilian a ₱1,000 a monthly allowance para kadagiti amin nga estudiante a Filipino manipud kindergarten agingga iti kolehio, a mangimarka iti dineskribirna a kas “agpaut a panagipuonan para iti masakbayan ti pagilian.”

Iti babaen ti gakat a National Student Allowance Program (NSAP) Act, amin a nakaenrol nga estudiante a makaragpat iti minimum attendance requirements ket maikari iti binulan a subsidy a nairanta a mangsakup kadagiti kangrunaan a kasapulan a mainaig iti pagadalan kas iti taraon, transportasion, ken dagiti masapsapulda.

“Saan nga ayuda wenno short-term relief daytoy. Naibasar daytoy a programa iti pammati a ti panagpuonan iti tunggal estudiante a Filipino ket panagpuonan iti agdama ken masakbayan ti pagilian,” kinuna ni Legarda.

Ti addang ket mangkomplementar iti counterpart bill nga impila iti Kamara ti anakna a ni Rep. Leandro Legarda Leviste, a mangpatibker iti inawagan ni Legarda iti shared commitment-da para iti accessible ken inclusive education.

Nasional

₱800 a nayon iti binulan a sueldo dagiti katulongan iti NCR, marugian inton Pebrero 7

Maiwaras ti alawans babaen dagiti student ID card wenno digital voucher a mabalin laeng nga usaren kadagiti accredited school canteens, transport providers, ken school supply vendors.

Itantandudo pay ti gakat ti digital financial inclusion babaen ti panangipalubosna a mausar pay ti student card a kas kangrunaan a savings wenno e-wallet account.

“Madisenio daytoy a kas alawans a mabalin laeng nga usaren para kadagiti gastos a mainaig iti pagadalan. Makatulong met dagiti student card wenno digital voucher a mangikkat iti korupsion ken masigurado a patas a makadanon daytoy a tulong iti tunggal estudiante iti pagilian,” kinuna pay ni Legarda.

Tapno masigurado ti panagtul;tuloy daytoy, mabilin met ti Department of Finance a mangaramid iti funding framework ken mangisayangkat iti actuarial study iti tunggal lima a tawen.

Maikkan ti Bangko Sentral ng Pilipinas ken dadduma pay nga implementing partners iti annongen a mangsigurado ti accessibility dagiti serbisio, nangruna kadagiti nasulinek ken saan unay a naserbian a lugar.

No maipaulog, manamnama a mabenepisiaran ti programa ti nasurok a 30 a milion nga estudiante iti entero a pagilian. (Wilnard Bacelonia/PNA)