Naikeddeng a sukimaten ti Philippine Navy (PN) dagiti navy destroyer manipud iti Japan a naiwaragawag a mayawat iti Filipinas kas paset ti umun-uneg a singgalut iti panangdepensa ti dua a pagilian.
Nagsaganan ti PN para iti joint visual inspection (JVI) dagiti Abukuma-class destroyer escort manipud iti Japan Maritime Self-Defense Force (JMSDF) kalpasan ti awis manipud iti Japan Ministry of Defense.
Kinuna ni panakangiwat ti PN Captain John Percie Alcos a ti inspeksion ket paset ti panagsasarita maipapan iti posible a pannakayakar dagitoy nga alikamen ti Navy iti Filipinas.
Segun iti pagiwarnak ti Japan a Yomiuri Shimbun, immanamnong da Japanese Defense Minister Gen Nakatani ken Sekretario ti Department of National Defense (DND) Gilberto Teodoro Jr. iti panggep a panagangkat kadagiti navy destroyer escort iti naangay a Shangri-La Dialogue iti Singapore idi Hunio.
Ombudsman Remulla, paspasungbaten ti Korte Suprema iti petision ni Zaldy Co
Nairaman iti napagsaritaanda ti pannakayakar ti innem nga Abukuma-class destroyer escort a 30 tawenen nga us-usaren ti JMSDF ket sukatanen ti Mogami-class frigates.
Segun ken ni Alcos, mangibaonda iti eksperto manipud iti PN a mangtingiting kadagiti bapor, a mangigiya iti panagsasarita maipapan iti posible a pananggatang ti PN kadagitoy ken ti pannakaitunos daytoy iti tarigagayda a modernisasion. (Martin Sadongdong/Manila Bulletin//Lito Hilidon/Bannawag)
