Sangapulo ket lima a polis, a pakairamanan ti maysa nga opisial nga addaan iti ranggo a lieutenant colonel, ti addan iti restrictive custody iti Camp Crame iti Quezon City, para iti agtultuloy nga imbestigasion iti kaso dagiti mapukpukaw a "sabungeros" wenno mammallot.
Daytoy ti kinompirmar a mismo ni hepe ti Philippine National Police (PNP) Gen. Nicolas Torre III idi Lunes, Hunio 7. Segun kenkuana, nakadestino dagiti 15 a polis iti nadumaduma a yunit, pakairamanan dagiti adda kadagiti rehion, ken innayonna a 14 kadagitoy ti adda iti aktibo a serbisio idinto a ti maysa ket naitudingen nga agretiro.
Ngem kinuna ni Torre a saan a maipamaysa ti imbestigasion iti mapapati a pannakairaman dagiti 15 a polis laeng a nabigbig, nga inlawlawagna nga ad-adu pay a polis ti maimbestigar depende iti resulta ti madama nga imbestigasion.
“Saantayo nga agsardeng kadagitoy 15 a polis (laeng), bukibokentayo ti amin. Mabalin nga adda (pay) sumagmamano a personalidad a maduktalan kabayatan ti imbestigasion ket ti napateg kadakami ket ti panangipaay iti hustisia kadagiti biktima,” kinuna ni Torre.
Kasapulan ti natibker ken nainkalintegan a pagtaktakderan iti parikut iti WPS --NMC
“Nakaam-amak dagitoy nga insidente, saan a maakseptar iti ania man a pagalagadan isu a natibker a determinasionmi a mangrisut iti daytoy,” innayonna.
Singay manen ti kaso dagiti mapukpukaw a "sabungeros" kalpasan nga imbunannag ni Dondong Patidongan, a nagkuna a nadekket a kaduana ni Atong Ang, nga adda pakainaigan ni Ang iti panagpukaw ken pannakapapatay dagiti "sabungeros" gapu kadagiti anomalia kadagiti operasion ti pallot. Kinuna pay ni Patidongan nga umabot iti 100 ti bilang dagiti nagpukaw a "sabungeros."
Indarum met ni Ang ni Patidongan bayat nga inlibakna ti pannakairamanna iti kaso dagiti mapukpukaw a "sabungeros."
Imbatad pay ni Patidongan nga adda sumagmamano a polis nga adda iti payroll ni Ang ket adda napateg nga akem dagitoy iti panagpukaw dagiti "sabungeros."
Ita ta addan dagiti 15 a polis iti restrictive custody, kinuna ni Torre a makitinnulongda iti National Police Commission iti pannakaisayangkat ti imbestigasion.
Kinunana a maimbestigar dagiti polis kadagiti kaso a kriminal ken administratibo.
Innayon ni Torre a malaksid iti Taal Lake a nakaibellengen ti sumagmamano kadagiti mapukpukaw a "sabungeros," nakaawatda kadagiti report nga adda pay dadduma a wagas ti pannakaibelleng kadagiti "sabungeros."
Kinuna pay ni Torre a sakbay pay a rimmuar iti publiko ni Patidongan ket inakusaranna ni Ang, nabayagen a nakisarita kadakuada ni Patidongan ket nangipaay daytoy iti impormasion para iti pannakaisayangkat ti imbestigasion.
Segun ken ni Torre, napasamak daytoy idi isu pay laeng ti daulo ti Criminal Investigation and Detection Group (CIDG), nga isu ti gapuna a nakaisubmitirdan kadagiti dokumento iti Department of Justice (DOJ). (Aaron Recuenco/MANILA BULLETIN)
