Pinaayaban ti Department of Foreign Affairs (DFA) ti Embahador ti China a ni Huang Xilian idi Hulio 4 gapu iti inyetnagna a dusa ti China ken ni dati a Senador Francis Tolentino.
Segun ken ni DFA Secretary Ma. Theresa Lazaro, nupay adda legal a kalintegan ti China a mangyetnag iti dusa, ti panangyetnag daytoy iti dusa a maibusor iti nabotosan nga opisial gapu kadagiti aramidna a mainaig iti akemna ket saan a maitunos iti pagalagadan ti panagraem ken panagsasarita nga agbatbatay kadagiti relasion iti nagbaetan ti dua nga agpada a soberano nga estado.
Pinalagipan ti DFA ti Embahador ti China a kas maysa a demokratiko a pagilian, raemen ti Filipinas ti kalintegan iti panangyebkas.
Itay napan a lawas, inwaragawag ti Chinese Foreign Ministry nga ipakatda ti dusa iti dati a senador gapu iti kunada a nakadakdakes a kababalinna mainaig iti isyu a mainaig iti China.
Kasapulan ti natibker ken nainkalintegan a pagtaktakderan iti parikut iti WPS --NMC
Ni Tolentino ti dati a daulo ti Special Committee on Philippine Maritime and Admiralty Zones ti Senado a nangitandudo iti pannakaipasa ti Philippine Maritime Zones and Archipelagic Sealanes Acts, a nangdakamat iti 2016 arbitral award a nangipasingked iti kalintegan ti Filipinas iti West Philippine Sea.
Idi panagkakampania iti 2025 elections, kinuna ni Tolentino a bumibiang ti China iti eleksion ken nangontrata ti Embahada ti China iti Manila iti maysa a kompania tapno mangiwarnak kadagiti mensahe a pabor iti China iti social media. (Raymund Antonio/Manila Bulletin//Lito Hilidon/Bannawag)
