Inlawlawag ti Malakanyang ita nga aldaw, Hulio 8, a saanda a dinakamat ni Senador Mark Villar a mismo a makagapu kadagiti joint venture ti PrimeWater kadagiti local water district.
Iti maysa a press briefing, sinungbatan ni Undersecretary ti Presidential Communications Office (PCO) Claire Castro dagiti saludsod maipapan iti tiempo a nabukel dagiti kontrata, nga immadu idi 2019 a nagakman ni Villar a kas daulo ti Department of Public Works and Highways (DPWH), ti ahensia a mangimatmaton iti Local Water Utilities Administration (LWUA).
Kinuna ni Castro a saanda a pabpabasolen ni Sen. Villar, ta nairana laeng nga isu ti daulo ti DPWH idi.
Im-imbestigaren ti gobierno ti PrimeWater, a kukua ti kabsat ni Villar ken paset ti negosio ti pamilia Villar, gapu iti reklamo dagiti konsiumer a pannakasinga ti serbisio ken saan a natalged a suplay ti danum kadagiti lugar iti pagilian a serserbisiuanda.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Sen. Villar nga awan ti direkta wenno saan a direkta a pakainaiganna kadagiti transaksion ti PrimeWater bayat ti panagpaayna a kas sekretario ti DPWH.
Indauluan ni Villar ti DPWH manipud 2016 agingga iti 2021, iti babaen ni dati a presidente Rodrigo Duterte. (Darryl John Esguerra/PNA//Lito Hilidon/Bannawag)
