Siam kadagiti 12 a nangabak a kandidato a para senador iti Mayo 12 mid-term elections ti nakagastos iti nasurok a ₱100 a milion ti tunggal maysa para kadagiti aktibidadda iti kampania.
Maibatay iti Statements of Contributions and Expenditures (SOCE) nga insubmitir dagiti nangabak a senador ken inruar ti Commission on Elections (Comelec), ni Senador Camille Villar ti immuna iti listaan, a nakagastos iti ₱179,642,664 bayat ti entero a panawen ti kampania manipud Pebrero 11 agingga iti Mayo 10.
Maikadua ni Senador Lito Lapid, a nakagastos iti ₱163,580,568; maikatlo ni Senador Pia Pia Cayetano, ₱162,014,961; maikapat, Senador Imee Marcos, ₱139,298,208; maikalima, Senador Ronald dela Rosa, ₱128,728,961; maikanem, Senador Bong Go ₱127,313,761; maikapito, Senador Francis "Kiko" Pangilinan, ₱119,400,972; maikawalo, Rodante Marcoleta, ₱112,857,951; ken maikasiam, Erwin Tulfo, ₱110,358,697.
Dagiti senador a nababbaba ngem ₱100 a milion ti nagastosda: Senador Tito Sotto, ₱96,638,901; Bam Aquino, ₱86,150,395; ken Senador Panfilo "Ping" Lacson, ₱18,955,871.
Independent People's Commission, anti-political dynasty, party-list reform bill, prioridad ti Senado
Impakita met dagiti SOCE nga inruar ti Comelec a nakaawat ni Cayetano iti kangatuan a kantidad ti kontribusion a ₱169,623,644.
Nakaawat met iti suporta a kuarta da Dela Rosa, ₱160,601,884; Lapid ₱160,300,000; Villar, ₱159,640,000; Marcos, ₱138,500,000; Go, ₱PHP125,942,386; Tulfo, ₱120,130,000; Pangilinan ₱119,400,972; Lacson, ₱118,510,777; Aquino, ₱86,962,657; ken Sotto, ₱35,500,000.
Indeklarar ni Marcoleta nga awan ti naawatna a kontribusion a kuarta.
Palubosan ti linteg ti tunggal kandidato a mangbusbos iti tallo a pisos iti tunggal rehistrado a botante. Nasurok a 68 a milion ti rehistrado a botante para iti mid-term elections ita a tawen. (Ferdinand Patinio/PNA)
