Binabalaw ni Makati City Mayor Nancy Binay idi Domingo, Hulio 6, ti inawaganna a “midnight deal” (indardaras a pannakitulag) ti napalabas nga administrasion ti siudad iti kontraktor ti proyekto ti subway ti Makati nga aggatad iti ₱8.96 a bilion, a nangted iti naan-anay a panangtagikua ti city government iti proyekto, sumagmamano laeng nga aldaw sakbay a nagpatingga ti termino ti dati a mayor a kabsatna.
Iti maysa nga statement, kinuna ni Binay a ti katulagan, nga inaprobaran ken pinirmaan ti Makati City Council idi Hunio 23, ket manggikalikagum nga agbayad ti city government iti ₱8.96 a bilion iti Philippine InfraDev Holdings Inc. (InfraDev) iti uneg ti 90 nga aldaw manipud pannakaipaulog ti consent award ti Singapore International Arbitration Center (SIAC).
“Agpeggad ti pinansial a salun-at ti Makati apaman nga ipaulog ti SIAC ti nasao a settlement agreement. Kinapudnona, gapu iti nakanselar a Makati Subway Project, saan a kabaelan ti siudad ti agbayad iti umabot iti ₱9 a bilion iti Philippine InfraDev Holdings," inlawlawagna, ken innayonna a mabalin nga apektaran pay daytoy dagiti agdama a proyekto ti siudad.
Awan met ti agdama nga appropriation iti badiet ti Makati iti 2025 tapno masakupan ti nasurok a ₱8 a bilion a gatad maibasar iti certification letter nga inruar ti City Budget Department idi Hulio 3.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ni Binay a binilinnan ti legal department ti Makati nga isaganada dagiti kasapulan a dokumento tapno mailawlawag ti takder ti siudad iti nasao a katulagan iti SIAC.
“Saantayo la ketdi nga akseptaren ti maysa a settlement a kastoy ti kadakkelna no awanan transparency, due diligence, ken legal safeguards. Kadagiti kastoy a klase ti aramid, dagiti umili ti agsagaba. Mangipaulogakto met iti executive order a mangbukel iti fact-finding committee a mangimbestigar ken mangkita kadagiti amin a proyekto ti Public-Private Partnership a nakitulagan ti city government tapno masigurado a kanayon a masalakniban ti kasayaatan nga interes dagiti umili ti Makati,” inlawlawag ni Binay.
Gapu iti Covid-19 pandemic, naisardeng ti pannakaibangon ti 11-kilometro a Makati Subway Project, a narugian idi 2018 ken nairanta a mangserbi iti agarup 700,000 a commuter iti inaldaw,
Idi 2022, maysa a pangngeddeng ti Korte Suprema, a nangibilin iti pannakayakar ti hurisdiksion dagiti 10 nga Embo (enlisted men’s barrios) barangay manipud iti Makati City iti Taguig City, ti nangapektar iti alignment ti proyekto.
Daytoy ti nangtignay iti InfraDev a mangideklarar iti subway project a saanen nga economically and operationally feasible ta dadduma kadagiti istasionna ket addan iti babaen ti hurisdiksion ti Taguig. (Patrick Garcia/MANILA BULLETIN)
