Saan a bulsek ti International Criminal Court (ICC) tapno dina makita ti kinapudno iti drug war nga insayangkat ni dati a presidente Rodrigo Duterte, segun iti Malakanyang ita nga aldaw, Hulio 8.
Daytoy ti kinuna ti Malakanyang iti panggep ti abogado ni Duterte a ni Nicholas Kaufman nga idatagna iti ICC ti report ti Senate Committee on Foreign Relations maipapan iti pannakaarestar ni Duterte, a gapuanan ti napolitikaan a gandat tapno mapakapuy ti pamiliada iti politika.
Kinuna ni Undersecretary ti Presidential Communications Office (PCO) Claire Castro a saan a napintas a kapanunotan ti panangidatagda iti report ti Senado maipapan iti pannakaarestar ni Duterte.
Segun ken ni Castro, no makita ti ICC no kasano a naaramid ti imbestigasion ti Senado, saan a bulsek dagiti hues ti ICC tapno saanda a makita ti kinapudno iti likudan daytoy.
₱800 a nayon iti binulan a sueldo dagiti katulongan iti NCR, marugian inton Pebrero 7
Binalakadan ni Castro ti legal team ni Duterte nga ipamaysada koma ti atensionda no kasanoda a depensaan ti dati a presidente, idinto nga inaklon idin ni Duterte nga imbilinna ti pannakapapatay ti sumagmamano a tattao mainaig iti war on drugs. (Ruth Abbey Gita-Carlos/PNA//Lito Hilidon/Bannawag)
