Iningetan ti Commission on Filipinos Overseas (CFO) ti kampaniana tapno masalakniban dagiti Filipino manipud kadagiti mangal-allilaw a “ganggannaet nga agar-arem” ken dadduma pay a cross-border scam a mangal-allukoy kadagiti FIlipino iti saan a pudpudno wenno napnuan abuso a kasar iti ballasiw-taaw.
Iti maysa a pakdaar idi Mierkoles, Hulio 9, kinuna ni CFO Secretary Dante Ang II a nangaramid ti CFO iti watchlist mechanism tapno maduktalan dagiti red flag wenno pagilasinan, malapdan dagiti panangallilaw a pannakikasar, ken matunton dagiti agar-aramid iti maulit-ulit a pananggundaway kadagiti Filipino, nangruna dagiti babbai.
“Saan la a kampania daytoy kontra kadagiti pangallilaw a panagasawa, pannakidangadang daytoy tapno maitandudo ti dignidad, kinatalged, ken karbengan ti tunggal Filipino. Awan koma ti maibilang a commodity, nangruna a saan a dagiti babbai a maikari iti proteksion, respeto, ken pannakapabileg,” kinunana.
Impalgak ti CFO nga aktibo itan a mangpalpaliiw iti watchlist ti 356 a tattao, a pakairamanan ti 258 a foreign national, 60 a Filipino, ken 38 a maipagarup a marriage brokers a naireport gapu iti pannakipasetda iti illegal matchmaking activities.
Kasapulan ti natibker ken nainkalintegan a pagtaktakderan iti parikut iti WPS --NMC
Tapno ad-adda a mapasayaat ti gannuat, nangisayangkat ti CFO iti libre a serye ti webinar, ti “Human, Hindi Laruan,” a mangilawlawag no kasano a dagiti kas man la inosente a “ganggannaet nga agar-arem” ket adda labitna a trafficker in disguise dagitoy.
Kabayatan ti webinar, impalagip ni CFO Supervising Emigrant Services Officer Kimberly Dizon kadagiti Filipino, nangruna kadagiti babbai, a saan a tunggal marriage proposal ket maaramid iti naimbag a nakem.
“Masapul nga agtalinaedtayo a naridam kadagiti panangabuso a nakawesan a kas marriage proposal. Saan nga amin a ‘ganggannaet ng agar-arem’ ket addaan iti nasayaat a panggep,” kinunana.
Kinuna ti CFO a naipamaysa ti webinar iti Republic Act 10906 wenno Anti-Mail Order Spouse Act, a mamagbalin nga illegal ti panangkuarta iti panangipareha kadagiti Filipino kadagiti ganggannaet para iti panagasawa.
Indetalyena pay no kasano a masansan a mausar dagiti impormal a “panangireto” wenno fixed setup, social club, ken digital dating apps a mangallukoy kadagiti Filipino kadagiti pangallilaw wenno abusado a panagasawa.
Segun iti datos manipud iti United Nations International Organization for Migration (UN IOM), adda ti Filipinas a mairaman kadagiti kangrunaan a pagilian iti lubong a paggapgapuan dagiti migrante, a dagiti babbai a Filipino ti mangbukel iti 48.1 a porsiento kadagiti amin nga internasional a migrante.
Ipakita met ti kaudian a sangalubongan a trend nga adda itan mapattapatta a 281 a milion nga internasional a migrante wenno 3.6 a porsiento iti populasion ti lubong.
Kinuna ni Ang a ti CFO watchlist ken awareness efforts ket maitunos iti Bagong Pilipinas governance agenda ni Presidente Ferdinand Marcos Jr.
Ti CFO ti mangidadaulo nga ahensia ti Advocacy and Communications Committee iti babaen ti Inter-Agency Council Against Trafficking.
Inulit ti CFO ti kiddawna para iti panagridam, informed decisions, ken responsable a panangireport kadagiti mapagduaduaan nga eskema.
“Iti panangyussuattayo iti maysa a Bagong Pilipinas, pabaruentayo ti panagkumittayo a mangpabileg iti tunggal Filipino iti impormasion, ramramit, ken proteksion a kasapulanda tapno makaaramidda kadagiti natalged ken nadayaw a panagpili, nangruna kadagiti banag a makaapektar iti biag, relasion, ken masakbayanda,” kinuna ni Ang. (Marita Moaje/PNA)
