Mangidatag ni Senador Ronald “Bato” Dela Rosa iti mosion a mangimtuod kadagiti sumrek a kameng ti Senado ti maika-20 a Kongreso no kayatda met laeng nga ituloy ti impeachment trial ni Bise Presidente Sara Duterte.
Daytoy ti kuna ni Dela Rosa a mangkueskuestionar iti hurisdiksion ti Senado iti impeachment trial ni Duterte no aglukat ti maika-20 a Kongreso.
Inkalintegan ni Dela Rosa a sabali ti pakabuklan ti Senado idi maika-19 a Kongreso, ket sabali met iti maika-20 a Kongreso.
Kinuna ni Dela Rosa iti maysa a press conference ita a Mierkoles, Hulio 9, a gapu ta kiniddaw ti impeachment court ti Senado iti Kamara no kayat met laeng nga ituloy dagiti diputado ti maika-20 a Kongreso dagiti aramid ti maika-19 a Kongreso, rumbeng met a saludsoden dagiti Senador ti maika-20 a Kongreso no kayatda nga ituloy ti inaramid dagiti Senador iti maika-19 a Kongreso.
Kasapulan ti natibker ken nainkalintegan a pagtaktakderan iti parikut iti WPS --NMC
Segun ken ni Dela Rosa, masapul a pagbobotosan dagiti senador ti maipapan iti hurisdiksion ti maika-20 a Kongreso, ta patienna nga awan ti hurisdiksion ti Senado iti maika-20 a Kongreso iti impeachment trial ti bise presidente. (Dhel Nazario/Manila Bulletin//Lito Hilidon/Bannawag)
