Kinuna ni Presidente Ferdinand R. Marcos Jr. ita a Mierkoles, Hunio 9, nga isayangkat ti gobierno ti panggep a panangikkat kadagiti kontribusion ti Philippine Health Insurance Corp. (PhilHealth) para kadagiti pasiente ken panangipaay iti naan-anay a subsidized healthcare services para kadagiti Filipino.
Iti panagsaritana iti turnover dagiti medical transport vehicle iti Quirino Grandstand iti Manila, kinuna ni Marcos a saan laeng a ti panangpaadu iti emergency response equipment ti pakaipamaysaan ti administrasion no di pay ket iti pannakabangon ti natibtibker, mas accessible a healthcare system iti entero a pagilian.
“Isu nga itultuloytayo a papigsaen saan laeng a ti bilang dagiti transport vehicle, no di ket ti sibubukel a healthcare system,” kinuna ni Marcos.
Segun iti presidente, i-upgrade ti gobierno dagiti public hospital, mangipasdek kadagiti specialty center, ken palawaenna ti madanon dagiti Bagong Urgent Care and Ambulatory Service (BUCAS) center para iti non-emergency cases a saan a kasapulan ti pannaka-confine iti ospital.
Kasapulan ti natibker ken nainkalintegan a pagtaktakderan iti parikut iti WPS --NMC
“Imbabami dagiti bayad tapno uray kaskasano, no agpakita iti doktor wenno agpaimbag dagiti pasiente, adda latta kontribusionfa. In-inut a kissayanmi dagita a kontribusion ti pasiente,” kinunana pay.
Segun pay kenkuana, bayat ti isasayaat ti ekonomia, namnamaen ti gobierno a naan-anayton a maikkat dagiti kontribusion iti PhilHealth, a kapada dagiti sistema a maus-usar kadagiti dadduma a pagilian a bassit laeng ti ibayad dagiti pasiente.
Inadmitir ket ti presidente a saan pay nga umdas ti agdama a sistema ken badiet a mangsuportar iti no-contribution model, ngem kinunana nga ar-aramiden ti gobierno ti amin a kabaelanna tapno maurnos dagiti nasnasken a maisayangkat.
Kabayatan ti turnover ceremony, agdagup iti 387 a patient transport vehicles (PTV) ti naiwaras kadagiti nadumaduma a local government unit (LGU) iti Luzon, a segun iti Philippine Charity Sweepstakes Office, daytoy ti maibilang a kadakkelan a single-day distribution-na.
Maikkan met dagiti LGU iti Visayas ken Mindanao iti 123 ken 105 a PTV, kas panagsaganadda. (Darryl John Esguerra/PNA)
