Sumagmamano a polis a mapapati a nairaman iti uppat a tawenen a pannakapukpukaw dagiti 34 a "sabungeros" (mammallot) ti immasideg iti Philippine National Police (PNP) ken iti National Police Commission (Napolcom), a nangipasimudaag iti tarigagayda a tumulong iti maisaysayangkat nga imbestigasion.
Pinasangbay da PNP Chief General Nicolas Torre III ken Napolcom Vice Chairman and Executive Officer Rafael Vicente Calinisan daytoy a dumur-asan ti kaso ita nga ldaw, Hulio 9, ket kunada a mabalin nga agpaay a kas state witnesses dagiti dadduma kadagiti polis.
Kinuna ni Calinisan nga adun ti maaw-awatda a "feeler" ket namnamaenna a makaidatagda iti affidavit a makatulong iti imbestgasion.
Segun ken ni Torre, awatenna dagiti agboluntario nga agbalin a kas state witnesses iti kaso.
Kasapulan ti natibker ken nainkalintegan a pagtaktakderan iti parikut iti WPS --NMC
Nupay kasta, awan pay inaramidda nga opisial a testimonia iti PNP ken Napolcom.
Ur-urayen ti PNP ken Napolcom ti sworn statement manipud iti whistleblower a ni Julie “Dondon/Totoy” Patidongan a nangibutaktak nga adda 15 a polis a nairaman iti kaso dagiti mapukpukaw a mammallot.
Kinuna ni Calinisan a rummuar koman ni Patidongan a mangidatag iti affidavit-na iti Napolcom ta nabayag la unayen daytoy, ket uppat a tawenen nga agsagsagaba dagiti pamilia dagiti biktima.
Iti sabali a bangir, sapsapulen ti PNP ti dadduma pay a lugar a mabalin a nakaibellengan ti bangkay dagiti mammallot malaksid iti Taal Lake.
Pinagsagana metten ti Philippine Navy (PN) dagiti technical diver-da manipud iti Naval Special Operations Command (NAVSOCOM) para iti posible a panangtulongda iti panangsapul kadagiti bangkay dagiti mapukpukaw a mammallot iti Taal Lake. (Martin Sadongdong/Manila Bulletin//Lito Hilidon/Bannawag)
