Sungbatan ni Bise Presidente Sara Duterte dagiti saludsod mainaig kadagiti bank account-na iti umno a lugar--iti impeachment trial--ket innayonna nga awan ti obligasionna a sungbatan dagiti illegal nga agsapsapul iti impormasion maipapan kadagitoy.
Iti panagsaona iti The Hague idi Hulio 8, kinuna ni Duterte nga ur-urayenna ti impeachment trial tapno dita a sungbatanna dagiti alegasion nga adda nalimed a kinabaknangna ken kadagiti bank account-na.
Ngem innayon ni Duterte a no saan a matuloy ti impeachment trial, sungbatanna latta dagiti alegasion kenkuana iti publiko.
Inlawlawag ni Duterte a saannan nga idarum dagiti nangala iti impormasion ti bank account-na, ket itaklinna laengen daytoy iti Dios.
Kasapulan ti natibker ken nainkalintegan a pagtaktakderan iti parikut iti WPS --NMC
Ilunglungalong dagiti grupo a pabor iti impeachment ti pannakaituloy ti impeachment trial iti Senado tapno ma-subpoena dagiti bank account ni Duterte.
Ni dati a senador Antonio Trillanes IV ti nangibutaktak iti kaadda ti ₱2.4 a bilion a naideposito iti joint account ti bise presidente ken ti amana a ni dati presidente Rodrigo Duterte iti nagbaetan ti 2011 ken 2015. (Raymund Antonio/Manila Bulletin//Lito Hilidon/Bannawag)
