Malaksid pay iti panangipatulodda kadagiti "balikbayan box" ken dollar remittance kadagiti pamiliada iti Ilokos, naiganetget kadagiti Ilokano nga agnanaed wenno agtrabtrabaho iti ballasiw-taaw nga agawid ken tumulongda iti panagdur-as ti probinsia.
Daytoy ti mensahe ni Ilocos Norte Governor Cecilia Araneta Marcos iti ibibisita dagiti nasurok a 100 a delegado ti "Very Important Pinoy" (VIP) tour manipud iti Estados Unidos iti Ilocos Norte kas paset ti travel itinerary-da tapno mapadasanda dagiti kasayaatan iti Filipinas ken makirekonektarda manen kadagiti nagtaudanda.
"Sapay koma ta makitayo met ti Ilocos Norte a kas naraber a pagpaaraban," kinuna ni Marcos kadagiti delegado.
Gapu iti migrasion dagiti umilina kadagiti sabali a pagilian, agsagsagaba ti Ilocos Norte iti “brain drain,” a tamtamingen ti gobierno probinsial babaen ti panangpasayaat kadagiti kabalinan para iti panagdur-as babaen ti panagpataud iti panggedan.
ITI ILOCOS SUR: Mannalon, binagkongna ti kabsatna
Iti maysa a pangrabii a pinangsangaili ti gobierno probinsial kadagiti delegado idi rabii ti Martes, Hulio 8, imbaga ni Marcos kadakukada nga adun ti rimmang-ayan ti probinsia, isu a nasayaat a lugar para iti panagretiro ken panagnegosio.
Ti VIP Tour, a dati a maawagan iti Ambassador’s Tour, ti kangrunaan a programa ti turismo ti Philippine Foreign Service Posts iti Estados Unidos nga idauluan ti Philippine Embassy iti Washington DC.
Manipud Hulio 6 agingga 15, agpasiar dagiti delegado ti VIP Tour iti Manila, Laoag iti Ilocos Norte, Vigan iti Ilocos Sur, ken Puerto Princesa iti Palawan. Nairaman kadagiti delegado da Tourism Attache Gerald Panga ti Los Angeles, dagiti consul general a da Rosario Agana Lemque ti Agana, Arman Talbo ti Honolulu, Rowena Pangilinan-Daquipil ti San Francisco, ken Adelio Cruz ti Los Angeles.
Bayat ti kaaddada iti Ilocos agingga iti Hulio 10, mairaman iti itinerario ti grupo dagiti nalatak a heritage landmark kas iti Malacañang of the North, St. Augustine Church iti Paoay, Santa Monica Church iti Sarrat, ken Bantay Church and Tower iti Vigan.
Mapadasan met dagiti delegado ti panagdamili ken panagabel, ken maidasaranda kadagiti luto nga Ilokano kas iti empanada, tupig, bagnet, pinakbet, longganisa, ken dadduma pay. (Leilanie Adriano/PNA)
