Rinugianen dagiti autoridad ti search and retrieval operation iti bangkay dagiti 34 a mapukpukaw "sabungeros" (mammallot) a mapapati a napapatay ken naibelleng iti Taal Lake iti Batangas ita nga aldaw, Hulio 10.
Insayangkat dagiti nagtipon a kameng ti Philippine Coast Guard (PCG), Criminal Investigation and Detection Group ti Philippine National Police (PNP-CIDG), ken ti Department of Justice (DOJ) ti umuna a panangsawar itay 10:00 iti bigat.
Nangrugida a nagsawar iti maysa a lugar a piskaria nga ab-abangan ti maysa kadagiti suspek iti Talisay, Batangas, ken dinakamat ti whistleblower a ni Julie "Totoy/Dondon" Patidongan a kas ti mapapati a dumpsite.
Daytoy ti umuna nga aktual a panagbatokda tapno sapulenda dagiti mammallot a nagpukaw iti nagbaetan ti Abril 2021 ken Enero 2022 kadagiti nadumaduma a cockpit arena ken iti pagtaengan dagiti biktima iti Laguna, Batangas, Manila, ken Bulacan.
Kasapulan ti natibker ken nainkalintegan a pagtaktakderan iti parikut iti WPS --NMC
Nupay kasta, dakkel a karit ti sarangtenda, ta 234 a kilometro kuadrado ti kalawa ti Taal Lake ken 198 a metro ti kaadalem daytoy, isu a kasla la agsapsapulda iti dagum iti kagaramian.
Kinuna ni panakangiwat ti PCG Captain Noemie Cayabyab nga agusardan iti kabaruanan nga alikamen iti operasionda, kas kadagiti unmanned aerial vehicles (UAV) ken remotely operated vehicles (ROV) wenno drones.
Iti sabali a bangir, ti PNP-CIDG ti mangbantay iti aglawlaw ti Taal Lake.
Tumulong dagiti diver ti Philippine Navy manipud iti Naval Special Operations Command (NAVSOCOM) iti nasao nga operasion, ket baonenda ti tallo a grupo dagiti diver-da a buklen ti uppat a kameng ti Navy SEALs (Sea, Air, Land) a makabael a bumatok iti agingga iti 94 meters below sea level, a dandani kagudua ti kaadalem ti Taal Lake. (Martin Sadongdong/Manila Bulletin//Lito Hilidon/Bannawag)
