Sinupiat dagiti kangrunaan a pagadalan ti Katoliko iti pagilian ti singasing a pannakaikkat ti senior high school (SHS) iti sistema ti edukasion iti Filipinas, a kunada a saan a naintiempuan ken "saan a mangikabilangan iti masakbayan" daytoy a tignay.
Iti joint statement nga inruarda idi Hulio 9, inrupir ti Catholic Educational Association of the Philippines (CEAP) ken ti Episcopal Commission on Catholic Education (ECCE) ti Catholic Bishops’ Conference of the Philippines (CBCP) ti pannakaitultuloy ti SHS program iti sidong ti K-12 curriculum, ket indagadagda kadagiti mammanday-linteg a di mawaswas no di ket marepormar la koma daytoy.
Segun kadakuada, saan nga aksidente a naipaulog ti SHS program a narugian idi 2016 no di ket gapuanan daytoy ti maysa a sirmata a mangbitibit iti sistema ti edukasion ti Filipinas tapno makaragpat iti internasional nga standard ken sungbat iti agbaliwbaliw a kasapulan dagiti Filipino nga estudiante ken dagiti panggedan.
Naipatungpal babaen ti Enhanced Basic Education Act of 2013, narugian ti SHS program idi 2016 a kas sungbat iti giwang iti kolehio ken kinasagana iti trabaho dagiti nagturpos a Filipino.
Kasapulan ti natibker ken nainkalintegan a pagtaktakderan iti parikut iti WPS --NMC
Binigbig ti dua a grupo dagiti balido a parikut kas iti curriculum overload, nakurang a kualipikado a mannursuro, ken nakapuy a work immersion program. Ngem kinunada a saan nga ibilang a sistematiko a pannakapaay ti parikut iti panangipatungpal ti programa.
Imballaag ti grupo a ti panagsubli iti dati a sistema a 10-year curriculum ti mangwaswas kadagiti nagun-odan ken mangsayang iti nagpuonan ti gobierno ken ti pribado a sektor.
Innayon ti grupo nga imbes a paidaman dagiti estudiante iti dua a tawen a pannakabalbaliwda, masapul ketdi a reggetan ti gobiernno ken dagiti maseknan iti edukasion a mangtungpal iti orihinal a kari ti SHS--"ti mangipaay kadagiti agtutubo a Filipino iti kasapulanda a ramit, kabaelan, ken prinsipio tapno agballigida iti biag ken iti panagibangon iti pagilian." (Merlina Hernando-Malipot/Manila Bulletin//Lito Hilidon/Bannawag)
