Impasigurado ni nabotosan manen a diputado ti Manila 6th district Bienvenido "Benny" Abante Jr. kadagiti Filipino nga agsubli ti Quad-committee (quad-comm) iti Kamara iti maika-20 a Kongreso.
Daytoy ti impalgak ni Abante iti maysa nga interbiu idi Hulio 9, kalpasan a naalana ti baro a termino idi kallabes nga eleksion.
Nabukel ti quad-comm idi Agosto 2024, a nangisayangkat iti 15 a panangbista kadagiti agkakanaig a parikut iti POGO, extrajudicial killings (EJK), money-laundering, illegal drugs, ken ti war on drugs ni dati a presidente Rodrigo Duterte.
Ni laeng Abante ti natda iti dati nga uppat a co-chairman ti quad-comm idi maika-19 a Kongreso.
Committee on Justice ti Kamara, kabaelanda a tamingen ti dua nga impeachment complaint
Itay nabiit, inwaragawag ni dati a Surigao del Norte 2nd district Rep. Robert Ace Barbers, nga over-all chairman ti quad-comm iti maika-19 a Kongreso, nga adda "quad-comm version 2.0".
Segun ken ni Abante, adu pay ti masapul a pagsasaritaan ken ammuen ti quad-comm.
Itay Mierkoles, Hulio 9, impila manen ni Abante ken ti grupo a Young Guns ti Kamara ti dua a gakat mamnipud iti naglabas a Kongreso a nabukel kalpasan ti panagimbestigar ti quad-comm.
Dagitoy ti Civil Forfeiture bill, a mangipasubli kadagiti dagdaga nga illegal a naala dagiti ganggannaet, ken ti Anti-Extrajudicial Killing bill, a mangiparit ken mangdusa iti EJK a kas heinous crime. (Ellson Quismorio/Manila Bulletin//Lito Hilidon/Bannawag)
