Imbilin ni Gobernador ti Mountain Province Bonifacio Lacwasan Jr. ti madagdagus a pannakaipatungpal ti baro nga ordinansa a mangiparit iti panagpartuat, panaglako, ken panagiwaras kadagiti machine-made replica dagiti indigenous woven fabrics ken garments iti uneg ti probinsia.
“Masapul a salaknibantayo ti naabel a telatayo, a saan laeng a kas pagbiagan no di ket paset ti indiheno a kultura a tawidtayo manipud kadagiti kaputotantayo,” kinuna ni Lacwasan iti maysa nga statement idi Mierkoles, Hulio 9.
Dakdakamatenna ti Ordinance No. 573-2025, a nangrugi idi Hunio, nga addaan panggep a mangsalaknib ti authenticity ken sustainability ti tradisional a panagabel ti Cordillera, a sitatalinaed a napateg a panangngipabigbig iti kinasiasino ti tribu ken kas pagtaudan ti pamastrekan para kadagiti lokal a komunidad.
Mayaplikar ti ordinansa kadagiti amin a souvenir shops, garment stores, department stores, ken online sellers nga agop-operasion iti Mountain Province.
Maika-176 nga anibersario ti pannakabangon ti La Union, marambakan
Impaganetget ti ordinansa a ti Mountain Province ket pagtaengan dagiti nabayagen a nadayaw a tradision ti panagabel a nagramut iti indiheno a kultura.
Dagiti replika a naaramid babaen ti makina, segun pay iti ordinansa, ket apektaranna ti kultural ken ekonomikal a kasasaad dagiti pudpudno nga inabel a produkto, a madadael ti pateg ken authenticity dagitoy.
“Daytoy a panagabel ket ibagianna ti kultural a tawid ken kinalaing ken irepresentarna ti kinasiasino ti tribu dagiti nadumaduma a tribu ti Cordillera. Iti adun a siglo, maysa a napateg a paset ti indiheno a panagabel iti wagas ti panagbiag dagiti indigeno a tattao ti Cordillera, nga agserserbi nga agpadpada a kas wagas ti kultural nga ekspresion ken nagbalinen a paset ti pakasaritaantayo ken napateg a pagtaudan ti pagbiagan,” kuna pay ti ordinansa.
Tapno masalakniban ti kultura ken tawid ti Cordillera, iparit ti ordinansa ti produksion ken panaglako kadagiti naaramid iti makina a replilka ket mabalin a madusa dagiti negosio nga aglabsing iti ordinansa iti pannakakanselar dagiti permit-da ken pannakakompiskar dagiti naaramid iti makina nga inabel a lakoda. (Philippine News Agency)
