Sisasagana ni Bise Presidente Sara Duterte a mangsungbat no apay a nagusarda kadagiti palso a nagnagan dagiti benipisiario ti confidential fund ti Office of the Vice President (OVP), no agtuloy ti impeachment trial iti Senado.
Daytoy ti kinuna ni Duterte iti maysa nga interbiu iti ruar ti Scheveningen Prison iti The Hague, Netherlands idi Hulio 9.
Segun ken ni Duterte, kabaelanna nga ilawlawag dagitoy iti impeachment trial, ta agkalkalapen dagiti abogadona iti ebidensia ken affidavit manipud kadagiti saksi nga iparangda iti bista.
Kinuna ni Duterte a saan koma a patien amin nga ibagbaga dagiti kameng ti Kamara, nangruna ti maipapan kadagiti palso a nagnagan. Innayonna nga adda pagannurotan ti intelligence operations a mabalin nga agusar iti alias dagiti kameng ti intelligence.
Kasapulan ti natibker ken nainkalintegan a pagtaktakderan iti parikut iti WPS --NMC
Nabukel ti impeachment complaint maipuon iti panagimbestigar ti Kamara, a no namin-ano a liniklikan ni Duterte, iti pannakausar iti minilion a pisos a confidential fund ti OVP ken Department of Education (DepEd) idi 2023. Pinarubroban daytoy ti natakuatan ti Kamara a palso a dokumento a napirmaan ti mapagduduaan a nagan kas iti “Mary Grace Piattos,” “Fernando Tempura,” “Reymunda Jane Nova,” ken “Carlos Miguel Oishi.”
Ngem impanagetget ni Duterte a mailawlawagnanto dagitoy a nagnagan iti impeachment trial, ket mangiparangda iti dua nga eksperto iti intelihensia a kas resource person.
Agtalinaed ni Duterte iti The Hague agingga inton Hulio 23, ket dumar-ay iti “Free Duterte Rally” inton Hulio 27, sa agsubli iti Filipinas inton Hulio 28, ti aldaw ti maikapat nga State of the Nation Address (SONA) ni Presidente Marcos, ngem kinunana a saanna a dar-ayan daytoy. (Raymund Antonio/Manila Bulletin//Lito Hilidon/Bannawag)
