Impalgak ni Senador Panfilo "Ping" Lacson a sumagmamano a kongresman ti umaw-awat iti dadakkel a "pork barrel" allocations nga aggatad iti binilion a pisos.
Iti maysa nga interbiu iti One News idi Hulio 9, kinuna ni Lacson a dadduma a kameng ti Kamara ket mapapati a makaal-ala iti ₱15 a bilion idinto a ti dadduma a senador, makaal-ala iti ₱5 a bilion agingga iti ₱10 a bilion.
Kinuna ni Lacson a sakbay a indeklarar ti Korte Suprema nga unconstitutional ti Priority Development Assistance Fund (PDAF), ₱200 a milion a pork barrel laeng ti maal-ala dagiti senador ken ₱70 a milion kadagiti kongresman.
Dinakamat daytoy ti senador iti baet ti diskusion iti panangusigna iti 2025 General Appropriations Act (GAA), nga immun-una a nadakamatna a narangrangkay ken saanen a mabigbig.
Kasapulan ti natibker ken nainkalintegan a pagtaktakderan iti parikut iti WPS --NMC
"Nakitami ti maysa nga item a ti nagbassitan a barangay iti maysa a bassit nga ili ket nakaawat iti appropriation a ₱1.9 bilion. Maysa a bassit nga ili ti nakagun-od iti appropriation a ₱10 a bilion. Kuestionarek no mabalinda nga alaen dayta a gatad. Agasem, ti ₱10 a bilion a nailatang para iti bassit nga ili nga addaan iti 10,000 a residente. Saan a patas a pannakaiwaras ti badiet dayta," kinuna ni Lacson.
"Kayatko a malawlawagan daytoy. Ania ti napasamak iti ₱10 a bilion a nailatang iti bassit nga ili? Nakitami nga asideg daytoy iti igid ti karayan, ngem isu kadi ti kakaisuna nga ili nga addaan iti riverbank? Dagitoy nga appropriation ket para iti flood control," innayonna.
Impalagip ni Lacson a sakbay a nagpatingga ti naudi a terminona iti Senado idi 2022, nabalinanda ken dati a senador Franklin Drilon nga impaikkat iti badiet dagiti gastos para kadagiti proyekto a dredging ken flood control, gapu ta dagitoy ti ramut ti panagkunniber.
Dinakamatna met ti dimmanon kenkuana nga impormasion a ti backhoe para kadagiti programa ti flood control ket maus-usar laeng tapno maidispley--a sa la maaramat no adda inspeksion.
Inladawanna ti kasasaad ti pagilian a mangbusbos daytoy iti ₱16 a bilion ngem ₱12 a bilion laeng ti sueldona iti inaldaw, isu a kasapulanna met ti umutang iti ₱4 a bilion iti inaldaw.
"No ditay' agnakem iti panangisagana iti badiet, mabalin nga agnaay nga umutangtayo iti ₱6 a bilion iti inaldaw iti maysa agingga iti dua a tawen, ken ₱10 a bilion iti inaldaw kalpasan ti lima a tawen. Anianto ngaruden ti pagtungpalantayo?" kinunana. (Dhel Nazario/MB)
