Sinuratan ni US President Donald Trump ni Presidente Ferdinand “Bongbong” Marcos Jr. a yetnagna ti 20 a porsiento a taripa kadagiti tagilako a maangkat manipud Filipinas mangrugi inton Agosto 1.
“Singirenmi ti Filipinas iti Taripa a 20% laeng iti ania man ken amin a produkto ti Filipinas a maipatulod iti Estados Unidos, a naisina kadagiti amin a Sectoral Tariffs,” kinuna ni Trump iti suratna a napetsaan iti Hulio 9, a nangiladawan iti relasion ti panagtagilako iti nagbaetan dagiti dua a pagilian a kas “far from reciprocal.”
“Maawatanyo koma a basbassit nga amang ti 20% a bilang ngem iti kasapulan tapno maikkat ti Trade Deficit disparity-mi iti Pagilianyo,” innayonna.
Nangatngato ti baro a rate ngem ti damo a 17 a porsiento a taripa nga inwaragawag ni Trump idi Abril kas paset ti makunkuna a reciprocal tariffs kontra iti kaaduan a trading partners ti US.
₱800 a nayon iti binulan a sueldo dagiti katulongan iti NCR, marugian inton Pebrero 7
Idi agangay, sinuspenso ni Trump ti pannakaipatungpal dagitoy a nangatngato a taripa--malaksid iti 10 a porsiento a baseline--agingga iti Hulio 9 tapno mapalubosan ti negosasion. Sipud idin, naitantan daytoy agingga iti Agosto 1.
Kinuna ni Trump a kasapulan dagitoy a taripa tapno “makorehir” dagiti trade deficit kontra iti US, nga ibagbagana a “dakkel a pangta” iti ekonomia ken nasional a seguridad ti Amerika.
Maibasar iti datos manipud iti Office of the US Trade Representative (USTR), dimmanon iti $4.9 a bilion ti depisit ti US iti panagtagilako iti Filipinas idi 2024, a kayatna a sawen nga ad-adu ti inangkatna a tagilako manipud iti Filipinas ngem ti inyeksportna iti pagilian.
Idi napan a tawen, ti dagup a panagtagilako ti Amerika iti Filipinas ket dimmanon iti mapattapatta a $23.5 a bilion. Nagtalinaed ti US a top export destination ti Filipinas idi Mayo, a ti export value ket dumanon iti $1.12 a bilion, wenno 15.3 a porsiento iti dagup nga export ti pagilian, segun iti Philippine Statistics Authority (PSA).
Nasurok a kagudua kadagiti ilaklako ti pagilian iti US ket semiconductor ken dadduma pay nga elektroniko a produkto.
Idi makiddawan iti komento, inyebkas ni Semiconductor and Electronics Industries in the Philippines Inc. (SEIPI) President Danilo Lachica ti pannakadismayana iti baro a tariff rate.
“Nagsayaatan koma ti 17 a porsiento. Kitaentayo ti epekto ti 20-porsiento a taripa kadagiti eksport,” kinunana.
Maibatay iti surat ni Trump ken ni Marcos, dagiti tagilako a ma-transship--a maipatulod iti maikatlo a pagilian sakbay a makadanon iti US--ket maikkan pay iti nangatngato a taripa.
Imballaag pay ni Trump a no ikeddeng ti Filipinas ti mangingato iti taripa kontra iti US, mainayon daytoy a tariff rate iti 20‐percent tariff nga inyetnagna.
Impaganetget ni Trump nga awan ti taripa kontra iti Filipinas no ikeddeng dagiti kompaniana ti agaramid wenno agpartuat kadagiti produkto iti uneg ti Amerika.
Kinuna met ti DTI, iti maysa a statement, a maseknanda iti 20‐percent tariff nga impabaklay ti US iti laksid ti “panagregget ken kanayon a pannakilangen” ti gobierno iti US.
“Bigbigenmi dagiti pakaseknan ti Estados Unidos maipapan iti trade imbalances ken ti tarigagayna a mangpapigsa iti domestic manufacturing. Nupay kasta, nauneg ti panagkikinnonektar dagiti global supply chain, ket dagiti unilateral trade imposition ket makapadakes ti epektona iti sangalubongan nga ekonomia,” kinuna ti DTI. (Dexter Barro II ken Derco Rosal/MANILA BULLETIN)
