Ti pannakagun-od iti “unmodified opinion” manipud iti Commission on Audit (COA) ket dina kayat a sawen nga umisu ti pannakausar ti pondo ti Office of the Vice President (OVP), kas kinuna ti Malakanyang ita nga aldaw, Hulio 11.
Iti maysa a press briefing, inlawlawag ni Undersecretary ti Presidential Communications Office (PCO) Claire Castro tapno saan a maallilaw dagiti gagangay a Filipino iti "unmodified opinion" nga inyetnag ti COA.
Inlawlawag daytoy ni Castro kalpasan a nakagun-od ti OVP iti “unmodified opinion” manipud iti COA para iti fiscal year 2024.
Segun ken ni Castro, ti laeng pannakaiparang iti financial statement ti dakdakamaten ti "unmodified opinion" ti COA, a kaipapananna, nasurot laeng ti porma ti financial reporting framework.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuna ti COA a dagiti naipakuyog a pinansial a panangtingiting ket patas a naiparang ti OVP, iti amin a material a panirigan, agingga idi Disiembre 31, 2024.
Ngem inlawlawag ti COA a ti "unmodified opinion" ket dina kaipapanan nga awan ti palso a banag a naduktalan kabayatan ti audit, wenno awan dagiti naatur a palso a banag idi ngudo ti tawen.
Kinuna ni Castro a saan a patalgedan ti "unmodified opinion" nga awan ti anomalia iti OVP, ta agsupadi ti umisu a panag-report iti umno a panagusar iti pondo. (Ruth Abbey Gita-Carlos/PNA//Lito Hilidon/Bannawag)
