Insalakan ti Philippine National Police (PNP) ti maysa a bulanna pay laeng a maladaga a mapapati nga ilaklako ti mangay-aywan kenkuana iti Facebook iti gatad a ₱90,000, banag a nakaduktalan iti mabalin a maibilang a maysa kadagiti kadadaksan ken makarimon la unay a wagas ti panguartaan iti internet.
Insayangkat ti PNP Women and Children Protection Center (WCPC) ti entrapment operation iti Siudad ti Pasay idi Hulio 3.
Binabalaw ti National Authority for Child Care (NACC), a nakitinnulong iti nailimed nga operasion, ti agtultuloy a panaglako kadagiti maladaga iti laksid ti nainget a ballaag nga inyetnag ti gobierno.
“Ti panangilako iti maysa nga ubing tapno panguartaan ket maysa nga imoral, iresponsable, ken managimbubukod nga aramid. Ti nagannak a mangipagarup nga awan kabaelanna a mangpadakkel iti ubing, mabalin ken nalaka laeng nga agkiddaw iti suporta manipud iti barangay women’s desk, wenno iti Local Social Welfare and Development Office. Diyo koma panguartaan ken ikursong iti peggad dagiti ubbing," kinuna ni NACC Undersecretray Janella Ejercito Estrada.
Kasapulan ti natibker ken nainkalintegan a pagtaktakderan iti parikut iti WPS --NMC
Iningetan ti PNP WCPC ti operasionna kontra iti illegal a panaglako iti online kadagiti maladaga.
Aganayen nga 11 nga ubbing ti naisalana ti PNP WCPC ken nakaarestardan iti 16 nga aglaklako ita a tawen. Maysa kadagiti naarestar ti nakombiktaran iti krimen.
Manipud idi Hunio 16, kinuna ti PNP WCPC a nakamonitorda iti 12 a Facebook group nga aktibo a mangididiaya “online baby selling.” Addan dagitoy nga online page iti dagup a 200,000 a followers.
“Kiddawek iti Meta PH (akinkukua iti Facebook) a tulongandakami a mangpasardeng iti panagadu dagiti Facebook group ti ‘online baby selling’ ken dadduma pay a porma ti illegal adoption. Saanen a banag ti teknikalidad daytoy, no di ket moral nga obligadion a manamnama manipud iti maysa a social networking platform nga agop-operasion iti Filipinas,” impaganetget ni Estrada. (Martin Sadongdong/MB)
