Naikeddeng a mapan ni Presidente Ferdinand Marcos Jr. iti Washington iti "sumagmamano nga aldaw," kas kinuna ni US Secretary of State Marco Rubio idi Hulio 10, bayat ti agtultuloy a panagsarita ti dua a pagilian maipapan iti panagtinnulongda iti ekonomia ken seguridad.
Iti panagbitla ni Rubio iti Kuala Lumpur, Malaysia, kinunana a segseggaan ti Estados Unidos ti panangsangailina iti daulo ti Filipinas gapu iti inladawanna a "nagsayaat unay" a trilateral engagement-na iti Japan ken Filipinas.
Segun ken ni Rubio, napintas ti singgalut ti US iti Japan ken Filipinas ket makitinnulongda iti ekonomia, seguridad iti baybay, ken kinatalged ti teritorio--ken agtultuloy a parang-ayenda dayta a panagkakadua.
Innayon ni Rubio a padpadaanda ti panangsangailida iti presidente ti Filipinas iti Washington iti sumagmamano nga aldaw.
Kasapulan ti natibker ken nainkalintegan a pagtaktakderan iti parikut iti WPS --NMC
Saan pay a nangiruar iti official statement ti Malakanyang a mangpasingked iti papan ti Presidente iti Estados Unidos. Nupay kasta, naikeddeng a mapan iti US ni Special Assistant to the President on Investment and Economic Affairs Frederick Go ken dagiti kameng ti economic team ti presidente tapno pagsasaritaanda ti taripa ken nasaksaknap a panagtinnulong iti ekonomia. (Argyll Cyrus Geducos/Manila Bulletin//Lito Hilidon/Bannawag)
