Nangidatag ni Senador Alan Peter Cayetano idi Hulio 10 iti resolusion a mangdagdagadag iti gobierno ti Filipinas nga agapelar iti International Criminal Court (ICC) para ti interim release ni dati a presidente Rodrigo Duterte, ken maipasidong iti house arrest bayat ti panaguray iti pannakabistana.
Segun iti resolusion ni Cayetano, uppat a bulanen ni Duterte iti kustodia ti ICC sipud idi naarestar daytoy idi Marso 11, ket masapul a mapatgan ti interim release maibatay iti humanitarian grounds, ta agtawenen iti 80 ti dati a presidente.
Dinakamat ti resolusion ti kumapkapuy a salun-at ni Duterte, kinalakay ken napaut a pannakaisinana iti kagimongan kas rason iti pannakaipasidong ni Duterte iti house arrest. Innayon ni Cayetano a ti agtultuloy a pannakadetine ni Duterte ket adda dakkel nga epektona iti karirikna ken pisikal a salun-atna.
Impaganetget ti resolusion a rumbeng a maikkan ni Duterte iti kalintegan a maibilang nga inosente agingga a mapaneknekan a nagbasol, kas sagudayen ti linteg ti pagilian ken internasional. (Hannah L. Torregoza/Manila Bulletin//Lito Hilidon/Bannawag)
