Kinompirmar ti Department of Migrant Workers (DMW) idi Hulio 10 a naispal dagiti tallo a Filipino a tripulante ti cargo ship nga MV Eternity C kalpasan ti panangraut kadakuada dagiti rebelde a Houthi iti Red Sea.
Segun ken ni Sekretario ti DMW Hans Leo Cacdac, nagbalinen a walo ti bilang dagiti nakalasat iti limned a barko.
Nupay kasta, kinuna ni Undersecretary ti DMW Bernard Olalia a tallo met a Filipino a marino ti napapatay bayat ti iraraut dagiti rebelde a Houthi, ket napakaammuanen dagiti pamiliada.
Sangapulo pay a tripulante ti sapsapulen dagiti autoridad a nangisayangkat iti search and rescue operation.
Kasapulan ti natibker ken nainkalintegan a pagtaktakderan iti parikut iti WPS --NMC
Iti maysa a press briefing, kinuna ni Cacdac nga ammo ti DMW dagiti imbaga ti grupo a Houthi ken ti gobierno ti Estados Unidos nga adda dagiti tripulante a pilit nga innala ti grupo sakbay a limned ti barko. Ngem inlawlawag ni Cacdac a kompirmarenda pay daytoy a report.
Iti sabali a bangir, sinuspenso ti DMW ti lisensia ti ahensia dagiti Filipino a tripulante ti MV Eternity C, gapu iti saanda a panangidatag iti report nga agbiahe iti Red Sea ken Gulf of Aden ti barko a nagtrabahuan dagiti Filipino a marino.
Maibatay iti Department Order No. 1 nga inyetnag ti DMW idi Marso 2024, masapul nga ireport dagiti ship owner ken manning agency ti gandat a panagbiahe dagiti barko iti Red Sea ken Gulf of Aden, tapno masigurado nga ammo dagiti Filipino a marino dagiti peggad a lasatenda. Adda kalintegan dagiti Filipino a marino nga agkedked no agturong ti barko iti ruta nga adda riribuk. (Martin Sadongdong/Manila Bulletin//Lito Hilidon/Bannawag)
