Nasarakan dagiti technical diver ti Philippine Coast Guard (PCG) ti dua a sako iti Taal Lake, Batangas bayat ti panagleppas ti maikadua nga aldaw ti search and retrieval operations kadagiti bangkay dagiti 34 a mapukpukaw a "sabungeros" idi malem ti Biernes, Hulio 11, idinto nga imbaga ti maysa nga opisial a saan nga agpayso a "naimula" wenno impanda laeng dagiti naala a sako.
"Naiduma unay daytoy nga operasion. Saan a simple a krimen daytoy. No ania dagiti masarakantayo ditoy, mairama ti pannaka-DNA test-na, isu nga adda ti forensic team ken SOCO [Scene of the Crime Operatives] ditoy. No makasaraktayo kadagiti tulang ditoy, agdalan iti DNA test kadagiti mapukpukaw, makitatayo no kuan no naggapu dagitoy kadagiti sapsapulentayo a tattao wenno no 'naimula' laeng dagitoy," kinuna ni Commodore Geronimo Tuvilla, komander ti Coast Guard District Southern Tagalog.
"Saanmi a sayangen ti panawenmi iti daytoy no dagitoy a sako ket 'naimula' laeng. Nakitayo met ti peggad a sangsanguen dagiti diver-mi. No kasta ti kinarabaw ti panagkumitmi iti panagbirok, saanmi koma nga ipan ida iti kasta a peggad. Ibukbokmi ti puso ken panunotmi iti daytoy. Tunggal mangisayangkatkami iti panagbatok, maisarang ti diver iti peggad. Saan nga ang-angaw laeng daytoy, isu a saan koma a mabarengbareng ti ar-aramidenmi wenno matagibassit kadagiti espekulasion laeng," innayonna.
Maysa a sako ti naglaon kadagiti “napuoran a banag” ken nasarakan a nagalutan iti nadagsen a sandbag a kas man nairanta tapno lumned daytoy, segun ken ni Tuvilla.
Kasapulan ti natibker ken nainkalintegan a pagtaktakderan iti parikut iti WPS --NMC
Mapan a 30 agingga iti 40 a technical divers ti in-deploy ti PCG a nangisayangkat iti dua a diving operations. Nangrugi ti umuna agarup alas sais iti bigat ken nangrugi ti maikadua iti alas dos iti malem.
Naikkan dagitoy kadagiti diving gear ken tangke ti oxygen, ken adda naipan a diving rope iti dive site a mangiwanwan kadakuada no bumatok ken lumung-awda.
Narigatan dagiti diver a mangsukimat iti lansad ti dan-aw gapu ta nalibeg ti danum.
“Maibasar ti operating area iti intelligence information a naawatmi manipud iti Department of Justice ken impormasion manipud iti saksi,” kinuna ni PCG spokesperson Captain Noemie Cayabyab, a ti dakdakamatenna ket ti whistleblower a ni Julie “Totoy/Dondon" Patidongan.
Bayat ti pannakaileppas ti operasion, inwaragawag ti DOJ ti pannakadiskobre kadagiti dua a sako.
Nasarakan dagiti sako iti tukot ti Taal Lake iti Barangay Balakilong, Laurel, Batangas; ti maysa ket adda iti 70 a kadapan ken ti sabali pay ket iti 50 a kadapan.
Kinuna ni Tuvilla a saan a dagus a nakompirmar no tulang ti tao dagiti napuoran a banag.
Naipan dagiti sako ken linaonna iti cadaver bag ken inted dagiti diver iti DOJ ken Philippine National Police (PNP) para iti forensic examination tapno maammuan no tulang ti tao dagitoy ken no dagitoy ket konektado iti kaso dagiti mapukpukaw a "sabungeros." (Martin Sadongdong/MB)
