Imbilin ni Mayor Benjamin Lloren Cuaresma III ti Bambang, Nueva Vizcaya ti imbestigasion iti viral video a pakabuyaan iti sumagmamano nga estudiante a babbai a nangiduronduron, nangtungpatungpa, ken mangdisdisnog iti sabali nga estudiante a babai idi Martes, Hulio 8. Segun kadagiti report, estudiante dagitoy ti Bambang National High School.
Iti maysa nga official statement, imbilin ni Cuaresma iti administrasion ti Bambang National High School a madagdagus nga agimbestigarda ken bigbigenda dagiti nairaman iti insidente ti panag-bully.
In-upload ken in-share dagiti maseknan nga umili ti video iti social media, kangrunaan iti Facebook, ken nag-viral wenno nagwaras daytoy.
Kinuna ni Cuaresma nga "iti nasao a video, sumagmamano nga estudiante ti makita a pisikal a mangidurduron, mangdisdisnog, ken mangtungtungpa iti sabali nga estudiante, a mapapati a biktima ti bullying."
Maika-176 nga anibersario ti pannakabangon ti La Union, marambakan
Segun pay iti mayor, gapu ta napasamak ti insidente iti labes ti school grounds, nga iti pannakairaman dagiti estudiante a nakasuot iti uniporme ti pagadalan ken ti kinakaro ti kababalin a naipakita iti video, masapul ti madagdagus nga atension ken maitutop nga aksion.
Indagadag ni Cuaresma iti administrador ti pagadalan a makikoordinar kadagiti maseknan nga estudiante ken dagiti nagannak ken guardian-da ken mangaramid kadagiti nasken nga addang a maitunos kadagiti paglintegan ti Department of Education (DepEd).
Kiniddawna kadagiti autoridad ti pagadalan nga i-report-da a dagus dagiti addang a naaramid mainaig iti nasao nga insidente.
Inkari ni Cuaresma a mangipaay iti tulong iti pannakaitandudo iti natalged nga aglawlaw para kadagiti amin nga agad-adal. (Liezle Basa Iñigo/MB)
