Aw-awaten dagiti farmer-partner dagiti patubo ti indigenous food plants ken organic fertilizer iti Mariano Marcos State University iti Batac, Ilocos Norte. Ibingbinglay ti unibersidad ti technical expertise-na para iti pannakaiwaras dagitoy a mula. (Ladawan manipud MMSU)

Tallo a grupo dagiti mannalon iti Siudad ti Batac ken ili ti Sarrat ti nangipaganetget a siguraduenda ti pannakapreserbar dagiti indiheno wenno naisigud a mula a para taraon ken natural nga agas.

Babaen ti tulong ti Mariano Marcos State University (MMSU), 15 a partisipante manipud iti Adones Integrated Farm, Romaine Organic Agriculture Farm, ken Sarrat Farmers’ Association ti paset itan ti agtultuloy a pannakaipasdek ti programa ti MMSU a Community Foodscapes and Seedbanks of Ilocos Genetic Resources.

“Ipatpateg ti Adones Integrated Farm ti food sustainability ken panagtultuloy dagiti heirloom fruits and vegetables,” kinuna ti farm owner a ni Bernadeth Adones iti maysa a statement idi Biernes, Hulio 11, bayat ti panangipasingkedna iti naan-anay a suportana iti programa.

Mairaman kadagiti indiheno a mula a taraon iti Adones Integrated Farm ti alukon, sugodsugod wenno parugparog (momordica cochinchinensis), kapaskapas wenno sabidukong/bagbagkong (telosmaprocumbens), ken pako.

Lokal

Maika-176 nga anibersario ti pannakabangon ti La Union, marambakan

Kinuna met ni mannalon ken inheniero a John Lei Ganiron ti Romaine Farm a kaaduan kadagitoy nga indiheno a mula ket seasonal ken masarakan kadagiti kabambantayan.

Kasapulan ti metikuloso a panangaywan iti pannakapaadu dagitoy a mula kadagiti napatad a lugar nangruna no panawen ti tikag, kinuna ni Ganiron.

"Mabalintayo met nga imula dagitoy iti greenhouse ngem mabalin a nagastos," innayonna.

Kinuna ni Dr. Nathaniel Alibuyog, vice president for research, development, and innovation ti MMSU, a dagiti indiheno a mula a taraon a nangato a presiona iti merkado gapu ta seasonal dagitoy ken gapu ta sumagmamano laeng a mannalon ti agmulmula kadagitoy.

Kinuna ni Alibuyog a namnamaenna a babaen ti nasao a programa, umadu ti makaapresiar iti pateg dagiti indiheno a mula a taraon saan laeng a para iti pannakapreserbar ti kultura no di pay ket tapno makatulong pay a mangparang-ay iti seguridad ti taraon ken iti matgedan dagiti mannalon.

Iti maysa a lokal a panagadal, inlasin ti MMSU ti 46 nga indigenous species ti natnateng ken mula a makan iti Ilocos Norte ket nakiddaw ti pannakapreserbar ken intervention tapno saan a maungaw dagitoy. (Leilanie Adriano/PNA)