Binallaagan ni Bise Presidente Sara Duterte ti publiko a dida koma mamatpati iti “edited” a ladawan a maiwarwaras iti social media a maipagarup a ni dati a presidente Rodrigo Duterte a nakaidda a kasla sidadalit iti maysa nga ospital.
Iti maysa nga interbiu kenkuana iti ruar ti Scheveningen Prison iti The Hague, Netherlands idi Biernes, Hulio 11, imbinglayna kadagiti Duterte supporters ti health update maipapan iti amana ket linawlawaganna a saan a nakadalit daytoy a kas iti adda iti ladawan iti social media.
“Isu a saan nga agpayso daydiay a ladawan. Naedit la ketdi daydiay a ladawan. Saballi a pasiente daydiay, sinuktanda laeng iti rupa ni dati a presidente Duterte,” kinunana.
“Awan isuna iti ospital ti detention unit. Adda isuna iti regular wing ti detention unit. Magmagna ngarud itay a maymaysana nupay adda iggemna a sarukod. Isu a nalawag a saan nga agsakit isuna tapno maidalit,” inlawlawagna.
Kasapulan ti natibker ken nainkalintegan a pagtaktakderan iti parikut iti WPS --NMC
Sinarungkaran ti bise presidente ti amana, a naragsakan unay a nakakita kadagiti dua nga appokona, nga inkuyog ni Sara.
Kinuna ni Sara a mabalin a kiddawen iti International Criminal Court (ICC) no mabalinda ti mangiruar ti ladawan ti amana gapu ta agtultuloy ti panangipapan ti publiko iti salun-at ti dati a presidente. (Raymund Antonio/MB)
