Nayawiden iti pagilian ti 11 pay a Filipino a tripulante ti MV Magic Seas a rinaut dagiti rebelde a Houthi iti Red Sea, segun iti Department of Migrant Workers (DMW).
Idi Hulio 6, rinaut dagiti rebelde a Houthi ti MV Magic Seas bayat nga aglaylayagda iti Hodeidah, Yemen.
Adda 19 a tripulante ti MV Magic Seas, a pakairamanan ti 17 a Filipino a marino, a naispal kalpasan a nakapanawda iti barko sakbay a limned daytoy.
Agdagupen iti 17 ti nayaawid a Filipino a marino ti nasao a barko.
Kasapulan ti natibker ken nainkalintegan a pagtaktakderan iti parikut iti WPS --NMC
Simmangpet dagiti Filipino a marino iti Ninoy Aquino International Airport (NAIA) Terminal 3 iti Siudad ti Pasay babaen ti Singapore Airlines flight SQ 0918 idi rabii ti Sabado, Hulio 12.
Sinabet ida dagiti opisial ti DMW nga indauluan ni Sekretario ti DMW Hans Leo Cacdac, dagiti mangibagi iti Overseas Workers Welfare Administration (OWWA), Department of Health (DOH), Department of Social Welfare and Development (DSWD), Manila International Airport Authority (MIAA), ken ti Technical Education and Skills Development Authority (TESDA).
Impasigurado ni Cacdac a makaawat dagiti nagawid a marino iti pinansial a tulong manipud iti gobierno, agraman ti reintegration service, medical check-up, physical ken mental health assessment, ken psychosocial counseling. (Martin Sadongdong/Manila Bulletin//Lito Hilidon/Bannawag)
