Reprepasuen dagiti abogado ni dati a presidente Rodrigo Duterte ti nakaad-adu a a naidatag nga ebidensia iti kasona a crimes against humanity iti International Criminal Court (ICC) kas panagsaganada iti confirmation hearing a maaaramid inton Septiembre 23.
Daytoy ti kinuna ni Nicholas Kaufman a lead counsel ni Duterte idi Hulio 12, a nangipasigurado nga ad-adalenda a naimbag dagiti ebidensia nga indatag ti prosekusion.
Segun ken ni Kaufman, naruay dagiti indatag nga ebidensia ti prosekusion ket adda siam a kameng ti defense team a mangadal kadagitoy kas panagsaganada iti confirmation hearing.
Kinuna a Kaufman nga apresiarenda ti ania man a ganuat ti asino man a Filipino mangpaawid iti dati presidente, kas iti resolusion ni Senador Alan Peter Cayetano nga agkidkiddaw iti pannaka-house arrest ni Duterte iti Filipinas.
Independent People's Commission, anti-political dynasty, party-list reform bill, prioridad ti Senado
Ngem sakbay daytoy, nagkiddawen dagiti abogado ni Duterte iti ICC a mangipaay iti interim release daytoy, ken kinuestionarda ti hurisdiksion ti ICC iti kaso ni Duterte.
Saan pay a nangipaulog iti pangngeddeng ti ICC maipapan iti dua a petision.
Patien ni Kaufman nga adda kalintegan ni Duterte a mausig iti maysa a korte iti Filipinas, iti sango ti Filipino a hues, ken Filipino met laeng ti mangusig kenkuana. (Raymund Antonio/Manila Bulletin//Lito Hilidon/Bannawag)
