Imbilin ti Office of the Ombudsman (OMB) ti pannakaipila ti kaso a kriminal kontra ken ni dati a Department of Education (DepEd) Secretary Leonor M. Briones ken 13 pay a tattao gapu iti agbalor iti ₱2.4 a bilion a mapapati a nasobraan ti presiona nupay daanen a modelo a laptop a computer a nagatang idi 2021 para kadagiti mannursuro iti public school.
Malaksid ken ni Briones, imbilin pay ti OMB a maidarum iti graft ken falsification da dati a DepEd Finance undersecretary Annalyn M. Sevilla, Administration and Procurement undersecretary Alain Del Bustamante Pascua, assistant secretary Salvador C. Malana III, Director IV ti Information and Communications Technology Services Abram Yap Chai Abanil, Direktor IV Marcelo H. Bragado, Executive Assistant IV Alec S. Ladanga, Supervising Administrative Officer Selwyn Carillo Briones, Procurement Service (PS) Department of Budget and Management (DBM) Undersecretary Lloyd Christopher A. Lao, Director IV Jasonmer L. Uayan, Procurement Management Officer IV Ulysses E. Mora, Procurement Management Officer I Marwan O. Amil, Procurement Management Officer V Paul Armand A. Estrada, ken pribado nga indibidual a ni Froilan V. Domingo.
Imbilin pay ti OMB ti pannakaipila ti kaso a perjury kontra kada Lao, Sevilla, ken Uayan idinto a na-dismiss ti isu met la a kaso kontra kada Pascua ken Malana.
Nagtaud ti kaso iti kontrobersial a ₱2.4 a bilion a panaggatang kadagiti laptop para kadagiti mannursuro a nairanta para iti pannakaipatungpal ti Basic Education Learning Continuity Plan (BELCP) manipud 2020 agingga 2022.
Kasapulan ti natibker ken nainkalintegan a pagtaktakderan iti parikut iti WPS --NMC
Kinuestionar ti Commission on Audit (COA) ti DepEd iti 2021 annual audit report (AAR) daytoy no apay a "nanginngina, daanen" dagiti laptop idinto nga adda dagiti nalaklaka ken nasaysayaat nga alternatibo a magatang a laptop iti merkado.
Nasurok a 39,000 a units ti laptop ti nagatang iti ₱58,000 kada unit wenno agdagup iti ₱2.4 billion. Naipadamag a dadduma a mannursuro ti “nagkedked” wenno “nangisubli” dagiti laptop gapu ta saan a naragpat dagiti unit kadagiti ispesipikasion a kasapulan tapno maipatungpalda dagiti trabahoda.
Gapu kadagiti mapapati a sobra ti presiona a laptop, agarup 28,000 met a nairanta a maikkan a mannursuro ti saan a nakaawat kadagiti unit-da. (Czarina Nicole Ong Ki/MANILA BULLETIN)
