Inlawlawag ti Department of National Defense (DND) ita nga aldaw, Hulio 14, a nabayagen nga inlaksid ni DND Secretary Gilberto Teodoro Jr. ti pasaportena a Maltese, kalpasan a rimmuar ti isyu nga addaan "dual citizenship" ni Teodoro, ket saan a kualipikado nga agakem iti pagsaadan iti gobierno.
Daytoy ti impalgak ti DND kalpasan a naipablaak iti pagiwarnak a Manila Times ti maipagarup a Maltese passport ni Teodoro, a mamagbalin kenkuana a kas dual citizen.
Maibatay iti linteg ti Filipinas, maiparit a maaddaan iti dual citizenship dagiti agakem iti pagsaadan iti gobierno, nangruna dagiti agpaay iti gabinete.
Iti maysa nga statement, kinuna ti panakangiwat ti DND a ni Asst. Sec. Arsenio Andolong nga insuko ken inlaksiden ni Teodoro ti Maltese passport-na sakbay a nangipila iti certificate of candidacy (CoC) idi 2021 ken 2022 senatorial elections.
Kasapulan ti natibker ken nainkalintegan a pagtaktakderan iti parikut iti WPS --NMC
Naabak ni Teodoro idi 2022 elections.
Segun ken ni Andolong, naiparang ti Maltese passport ni Teodoro iti Bureau of Immigration (BI) ken Commission on Elections (Comelec) sakbay pay ti 2022 election.
Kinuna ni Andolong nga impakaammo ni Teodoro ti maipapan iti Maltese passport-na iti Commission on Appointments (CA) sakbay ti pannakakompirmar ti pannakadutokna a kas defense secretary idi Hunio 5, 2023.
Innayon ni Andolong a nalawag no ania ti panggep ti nasao nga artikulo iti Manila Times, ngem saannan nga impalgak no ania ti posible a motibo, ken no apay a napateg ti tiempo a pannakaipablaak ti nasao nga artikulo. (Martin Sadongdong/Manila Bulletin//Lito Hilidon/Bannawag)
