Madama a maisaysayangkat ti pannakayawid ti bangkay ti overseas Filipino worker (OFW) a caregiver a ni Leah Mosquera a natay dandani makabulan kalpasan ti nakaro a pannakadangranna iti missile attack ti Iran iti Rehovot City iti Israel.
Kinuna ni Department of Migrant Workers (DMW) Secretary Hans Leo Cacdac nga ibaklay ti gobierno ti amin a gastos para iti pannakaibiahe ti bangkay ni Mosquera, kasta met ti gastos iti funeral ken pannakaitabonna.
Segun pay ken ni Cacdac, mairaman pay iti tulong ti plete iti eroplano ni Mae Joy, kabsat ni Mosquera nga agtartrabaho met laeng a kas caregiver iti Israel.
Nairaman ni Mosquera kadagiti uppat a Filipino a nadangran idi natamaan ti maysa kadagiti ballistic missile nga impabanto ti Iran iti residential area iti Rehovot City idi Hunio 15.
Luistro: Mabalin a luktan manen ti Senado ti impeachment ni VP Duterte no paboran ti SC ti MR ti Kamara
Adda iti kritikal a kasasaad iti pannakayospitalna iti Shamir Medical Center, ken damo a naideklarar a natalgeden nupay addaan pay laeng iti suporta nga oxygen ken ventilator.
Ngem iti laksid dagiti nakananama a pagilasinan bayat ti isasarungkar ti kabsatna idi Biernes, pimmusay ni Mosquera kalpasan ti panangilabanna iti biagna iti dandani makabulan, segun ken ni Cacdac. (Aaron Recuenco/MB)
