Nalidayan dagiti mangngalap iti aglawlaw ti Taal Lake gapu iti ilalaka ti presio ti tawilis, a pabasolenda ti nasaknap a panagamak ti publiko a nainaig kadagiti damag a naibelleng dagiti bangkay dagiti mapukpukaw a “sabungeros” (mammallot) iti nasao a dan-aw.
Ti tawilis ket maysa a kita ti lames a masarakan laeng iti Taal Lake.
Segun iti grupo dagiti mangngalap a Pambansang Lakas ng Kilusang Mamamalakaya ng Pilipinas (Pamalakaya), bimmaba ti presio ti tawilis iti farmgate ken iti merkado iti agingga iti ₱100 kada kilo, idinto a ₱250 ti dati a presio daytoy.
Kinuna ni Chairperson ti Pamalakaya Fernando Hicap nga adu ti naaawatda a report a ₱100 laeng ti kada kilo ti tawilis iti sumagmamano nga ili iti Cavite, ket ad-adda a nalaka ti presio daytoy iti farmgate (iti mismo a nakakalapanna a lugar), a mabalin a mangitunda iti pannakalugi dagiti mangngalap iti Taal.
Kasapulan ti natibker ken nainkalintegan a pagtaktakderan iti parikut iti WPS --NMC
Imballaag ti Pamalakaya nga agtultuloy ti pannakalugi dagiti mangngalap no awan ti napardas a tignay.
Itay kallabes, nagpakdaar dagiti mangngalap iti igid ti dan-aw ti aglawlaw ti Taal gapu iti panagdanag ti publiko a nangrugi kalpasan a nagwaras dagiti di pay napasingkedan a damag a dagiti bangkay dagiti mapukpukaw a mammallot ket naibelleng iti dan-aw.
Segun ken ni Hicap, nupay inlawlawag a dagus ti Bureau of Fisheries and Aquatic Resources (BFAR) a natalged a para taraon dagiti lames iti Taal Lake, partikular ti tawilis, naapektaran latta ti presio ti produkto dagiti taga-Taal.
Malaksid iti daytoy, kinuna ti Pamalakaya a marigrigatanen dagiti mangngalap nga agkalap iti sumagmamanon a bulan gapu iti epekto ti abagat.
Gapu iti daytoy, dinagadagda ti Department of Agriculture (DA) ken BFAR a bumiangdan ken mangiwayatda iti wagas a mangpatalna iti situasion. (Jel Santos/Manila Bulletin//Lito Hilidon/Bannawag)
