Pormal a nangipila ni Julie “Totoy/Dondon” Patidongan, a kaduana dagiti pamilia dagiti mapukpukaw a mammallot ("sabungeros"), iti kaso kontra kadagiti 12 a polis a mapapati a nairaman iti pannakakidnap ken pannakapapatay dagiti mammallot.
Iti umuna a gundaway, nagparang ti whistleblower a ni Patidongan idi Hulio 14 tapno idatagna ken ni Vice Chairperson and Executive Director ti National Police Commission (Napolcom) Rafael Vicente Calinisan ti kaso a maibusor kadagiti polis a nairaman iti pannakapukaw dagiti nasurok a 100 a mammallot, ad-adu ngem iti 34 a damo a nabigbig ti Philippine National Police (PNP).
Kinuna ni Patidongan a rugrugi pay laeng daytoy, ken adda pay sumaruno ta mapan a 30 nga aktibo a polis ken opisial ti polis ti nairaman iti kaso.
Segun ken ni Patidongan, nagretiron dagiti dadduma a polis a nairaman iti kaso dagiti mapukpukaw a mammallot, ket kinunana nga adu ti aw-awatenna a kuarta tapno salaknibanda ti bulang ken e-sabong a kukua ni gaming tycoon Charlie "Atong" Ang.
Makabayan bloc, mangipila iti baro nga impeachment complaint kontra ken ni VP Duterte kalpasan ti one-year ban
Ngem kinuna ni Ang nga awan ti pannakiramanna iti pannakapukaw dagiti mammallot.
Innayon ni Patidongan nga idarumna pay ti retirado a police general a ni Jonnel Estomo, dati a regional director ti National Capital Region Police Office (NCRPO), ta maysa daytoy a kameng ti “Alpha Group” nga imatmatonan ni Ang.
Nupay kasta, saan pay a nagsao dagiti polis a dinakamat ni Patidongan, ngem immunan a kinuna ni PNP chief General Nicolas Torre III a 15 a polis ti addan iti restrictive custody gapu iti mapapati a pannakairamanda iti kaso.
Ti panangidatag ni Patidongan iti kaso ti pangrugian ti iwayat nga administrative investigation ti Napolcom tapno maikkan iti gundaway dagiti naidarum a mangsungbat iti kasoda. Maaramid ti sumagmamano a panangbista tapno agsango da Patidongan ken dagiti naidarum a polis iti Napolcom sakbay a mayetnag ti pinal a rekomendasion. (Martin Sadongdong/Manila Bulletin//Lito Hilidon/Bannawag)
