Indatag da Senador Christopher Go, Ronald dela Rosa, ken Robinhood Padilla ti maysa a resolusion iti Senado ita nga aldaw, Hulio 15, a mangdagadag iti gobierno ti Filipinas a mangkiddaw iti International Criminal Court (ICC) iti interim release ni dati a presidente Rodrigo Duterte ken iti pannaka-house arrest-na iti The Hague, Netherlands, gapu iti parikut iti salun-atna.
Segun iti resolusion, nasuroken a 100 nga aldaw ni Duterte a nakadetine iti ICC, bayat ti panangurayna iti pannakabista ti kasona a crimes against humanity gapu iti kampaniana kontra iti illegal a droga.
Impaganetget dagiti tallo a senador a ti kinalakay ni Duterte, ti panagrakaya ti salun-atna, ken ti pannakaisinana iti pamiliana, ti mangipalubos a maipakat ti humanitarian consideration.
Nupay binigbigda a saanen a paset ti Filipinas iti Rome Statute idi 2019, kinuna dagiti senador a saan a makatubeng daytoy iti gobierno no tarigagayanna ti nasayaat a trato iti maysa a Filipino ken dati a presidente.
Kasapulan ti natibker ken nainkalintegan a pagtaktakderan iti parikut iti WPS --NMC
Iti biang ni Go, patienna nga agtigtignay ti sistema ti hustisia iti pagilian a mangikeddeng iti panangsungbat ti asino man nga umili kas maitunos kadagiti bukodna a linteg. (Dhel Nazario/Manila Bulletin//Lito Hilidon/Bannawag)
