Walo kadagiti 21 a Filipino a tripulante ti limned nga MV Eternity C ti natalgeden iti pantalan ti Jizan, Kingdom of Saudi Arabia ken addadan iti kustodia dagiti opisial ti gobierno ken dagiti shipping agency-da, segun iti Department of Foreign Affairs (DFA) ita nga aldaw, Hulio 15.
Impasigurado ti DFA a ti Philippine Consulate General iti Jeddah, ti Migrant Workers’ Office-Jeddah, ken dagiti manning agency ket makontakdan dagiti naisalakan a marino, ket agdalanda iti medical assessment sakbay ti naituding a panagawidda.
Iti maysa nga interbiu idi Hulio 14, kinuna ni Sekretaria ti DFA Ma. Theresa Lazaro a dagiti ahensia ken embahada iti Middle East ken iti London ket makikokoordinar kadagiti gobierno ti Saudi Arabia, ti United Kingdom, ti UK Maritime Operations, ken iti International Maritime Organization (IMO) tapno masigurado ti kinatalged dagiti Filipino a marino.
Inggunamgunam ni Lazaro kadagiti tripulante a saanda pay laeng koma aw-awaten ti trabaho iti barko no aglayag daytoy iti Red Sea, ta saan a natalged ti kasasaad sadiay.
Dati a sekretario ti DPWH Bonoan, palso nga impormasion ti intedna mainaig iti flood control project
Limned ti MV Eternity C iti Red Sea idi Hulio 10, sumagmamano nga aldaw kalpasan ti panangraut dagiti rebelde a Houthi bayat nga aglaylayag daytoy iti Hodeidah iti Yemen.
Adda 22 a tripulante ti MV Eternity C, a buklen ti 21 a Filipino ken maysa a Russian. (Raymund Antonio/Manila Bulletin//Lito Hilidon/Bannawag)
