Simmayaat ti panagtalek ti publiko kadagiti uppat a kangatuan nga opisial ti pagilian idi Hunio 2025, segun iti kaudian a resulta ti surbey nga impalgak ti Social Weather Stations (SWS) ita nga aldaw, Hulio 15.
Ngimmato ti net trust rating ni Presidente Marcos iti +18, a 48 a porsiento dagiti respondent a nangyebkas iti dakkel a panagtalek (much trust) ken 30 a porsiento ti nangipakita iti bassit a panagtalek (little trust).
Ipakpakita daytoy a dakkel ti ngimmatuanna sipud idi Mayo a nagun-odna ti -1 a net trust, maibatay iti 38 a porsiento a dakkel a panagtalek ken 38 a porsiento a bassit a panagtalek.
Adda 21 a porsiento a nagkuna a saanda a makadesision.
Kasapulan ti natibker ken nainkalintegan a pagtaktakderan iti parikut iti WPS --NMC
Ngimmato met bassit ti trust rating ni Bise Presidente Sara Duterte manipud 60 a porsiento idi Mayo, ket nagbalin a 61 a porsiento idi Hunio.
Adda 23 a porsiento a nangibaga a bassit ti panagtalekda, idinto a 14 a porsiento dagiti nagkuna a saanda a makadesision.
Ngimmato met ti trust rating ni Senate President Francis Escudero, a nakaala iti 55 a porsiento a dakkel a panagtalek, manipud iti 47 a porsiento idi Mayo.
Dakkel ti ngimmatuan ti trust rating ni Speaker Martin Romualdez manipud iti 26 a porsiento, nagbalin a 34 a porsiento ti addaan dakkel a panagtalek.
Iti sabali a bangir, bimmasit dagiti nagkuna a bassit ti panagtalekda ken ni Romualdez manipud 43 a porsiento, nagbalin a 34 a porsiento.
Insayangkat ti Stratbase ti surbey babaen ti Second Quarter 2025 Social Weather Survey manipud idi Hunio 25 agingga iti 29 a naaramid babaen ti rupanrupa a panagsaludsod kadagiti 1,200 a mangsungbat iti entero a pagilian. (Ellalyn De Vera-Ruiz/Manila Bulletin//Lito Hilidon/Bannawag)
