Sinuspenso ti Land Transportation Office (LTO) ti driver’s license ti maysa a passenger bus driver ta natiliwan iti video a mapapati nga agay-ay-ayam iti online a sugal babaen ti selponna bayat ti panagmanehona iti national highway iti Cavite.
Segun ken ni acting LTO chief Greg Pua, mabalin nga agtungpal a permanente a mapukaw ti drayber ti bus ti trabahona no mapaneknekan a nakabasol kas saan a mainugot nga agmaneho iti lugan kalpasan a nag-viral iti social media ti video-na nga ay-ay-ayam iti selponna bayat ti panagmanehona.
"Mabalin a nailuoden daytoy a drayber iti online gaming ta dina payen ikabkabilangan ti kinatalged dagiti pasaherona," kinuna ni Pua.
Inbatadna nga addan naipaulog a show cause order saan la nga iti drayber no di pay ket iti bus company.
Kasapulan ti natibker ken nainkalintegan a pagtaktakderan iti parikut iti WPS --NMC
Makasuan ti drayber iti reckless driving, panaglabsing iti Anti-Distracted Driving Act ken being an improper person to operate a motor vehicle, nga addaan iti maximum penalty a pannakawaswas ti driver’s license.
Iti biang ti bus company, kinuna ni Pua a kiniddawda nga ilawlawag ti kompania no apay a saan nga agsungbat gapu iti panangalana iti reckless bus driver.
Nangrugi amin iti panang-video ti maysa a pasahero a nakadlaw nga us-usaren ti drayber ti selponna bayat ti panagmanehona iti ruta a Silang-Dasmariñas.
Naammuan ti pasahero idi agangay nga agay-ay-ayam ti drayber iti online game.
Napakaammuanen ti drayber iti 90-day preventive suspension-na idinto a naipasidong iti alarma ti bus. (Aaron Recuenco/MB)
